Justice TS Thakur CJI shimogo

New Delhi, November 04 (Agencies): Supreme Court nung mapa nung taintiba judge, Justice TS Thakur-i December 02, 2015 nü Chief Justice of India (CJI), Justice HL Dattu mapa nungi anenba sülen pa melentsü.
Iba menden atema Hombar nü Justice Dattu-i Thakur tenüng sokar matsüngdang benoka liasü, ta sorkar ketdangser osang ka ajanga ashi.
Law ministry-i Justice Thakur appointment indang file maparen tembangba sülen ibaji Prime Minister’s Office dangi yoktsü. Kodang Tir-i ibaji agizükdir pa appoint asüba warrant agütsütsü, ta kasa osang ajanga ashi.
Justice Thakur ya India nung 43buba Chief Justice of India asütsü. Pa 1952 küm January 04 nü aso aser October 1972 nung Pleader ama iba wadang nung ajemok. Pai Jammu & Kashmir High Court nung mezüng law practice asü aser civil, criminal, tax aser Constitutional & service keno densema ken o tapu balala aika nung inyaka liasü.
Iba sülen pa Jammu and Kashmir High Court nung judge aküm aser tesülen Union minister-a inyakogo.
November 17, 2009 nü Justice Thakur Supreme Court judge shima liasü aser küm ka dak tema sülen pa January 4, 2017 nü Chief Justice menden nungi anisüngzüktsü.
Arishi küm 63 Justice Thakur ya Indian Premier League spot-fixing & betting ochimashi ken o nung taküm January nung obendang agütsüba bench nung tongti liasü.
Saradha chit fund ochimashi keno-a Thakur leniba nung Supreme Court bench kati ken o angadangdar, iba den külemi National Rural Health Mission indang sen crore aika nung ochimashiba keno-a pa leniba nung angadangdar.
Justice Thakur-i 1990 küm senior advocate jenjang angu. February 16, 1994 nü pa Jammu & Kashmir High Court nung additional judge shim aser March 1994 nungi Karnataka High Court nung Judge inyak.
September 1995 nung pa permanent judge shim aser July 2004 nung Delhi High Court-i transfer yoka liasü.
April 9, 2008 nü Justice Thakur ya Chief Justice of Delhi High Court shim aser August 11, 2008 nü Punjab and Haryana High Court Chief Justice shima liasü.