#JusticeForAhok: Jakarta nung Christian governor pusema lungkak aiter

Jakarta, May 12 (Agencies): Indonesia yimtiba Jakarta nung Christian governor-i Islam mezüngmeshiba atema tai tongloktsüba anema alima tesem balala nung pa pusemertemi shimo milen sentongtem ayongzüka agir.
Khristan yimsüsüri Islam mezüngmeshiba atema tai tonglokba atema Indonesia nung aser alima tesem balala nung nisung aikati ola adoker.
Taoba hopta okadaki Basuki ‘Ahok’ Tjahaja Purnama küm 2 tashi tepuokdak ayutsü atema obendang agütsü aser iba telemtetba anema Indonesia kübok yimti balala nung sentongtem ayongzüka agiyonga arudar.
Amsterdam, Toronto aser Melbourne yimtitem nunga Indonesia nungertemi Ahok pusema nungitba sentongtem ayongzüka agiogo aser nisung aikati hashtag #JusticeForAhok nung parnoki agiba sentongtem lemsatepogo, ta Associated Press ajanga metetdaktsü.
Ahok ya Jakarta nung mezüngbuba Khristan governor liasü saka taoba ita tu pai Muslim nunger tetoktepertem den tamakok angu.
Yaküm September ita Ahok-i election nüboyimba sentong ka nung Quran nungi tekong ka agiteta jembiba atema Muslim nungertemi pa aitsü.
Pa den toktepertemi ashiba agi, iba tekongji Muslim nunger masür kati azüngtsü makok.
Nübortemi pa nem vote agütsüdaktsütsü atema Ahok-i iba tekong amshi, ta parnoki tai tongloktsü.
Okadak obendanger Abdul Rosyad-i, “Ahok-i Muslim nunger temulung yirutsü aser shisabulu bener arutsü” ta ashi.
Ahok indang ken o atema obendang agütsübaji US state department, Amnesty international, UN nung human rights office aser UK ambassador to Indonesia nungertemia aitsüogo.
Iba ya Indonesia atema tammang anogo ka lir, ta Human Rights Watch nung Indonesia researcher, Andreas Harsono-ia obendang agütsüba anogonü metetdakja liasü.
“Indonesia putiotsü nung Islam mezüngmeshiba atema aitsüba ken o tulutibaji Ahok indang ken o lir. Pa ya Indonesia nung yimti tulutiba indang governor lir aser linük tir den teyariteper ka lir. Pa ama ka tepuokdaki yokra, tanüngba nisungtemi kechi tia ajurutsü?” ta Andreas-i ashi.