Justin Bieber, Coldplay-i BRIT Awards nung shilem agitsü

December 20, 2015: February 24, 2016 aonung London nung kentener Justin Bieber aser rock kentener telok ‘Coldplay’-i BRIT Awards nung shilem agitsü.

“Taruba küm award sentong nung tang alima nung shilem agi nüngtugu ana BRITs-i agizüktsü yongyaa atar- Coldplay ya music nung takok kanga angur rongnung ka lir ta onoki züngshir, aser pop kentener Justin Bieber-i tang mezüng BRIT awards nung shilem agitsü atema London-i arutsü,” ta BRITs chairman Max Lousada-i ashiba aceshowbiz.com osang ajanga metetdaktsü.

“Taruba küm awards ya British aser international music atema aonung tajung ka asütsü atema renemshidar,” ta Lousada-isa ashi.

Iba award sentong nung shilem agitsüpur tenüng tamalena kar sangdonga lir, aser item rongnung Adele, Bieber aser Coldplay nunger tang parnok kensep tasentem ajungkettsüba mapang ka lir.

Bieber indang “Purpose” kensep taoba ita November nung saya aser ibaji Billboard 200 jenjang mezüngbuba nung liasü, ajisüaka hopta ka sülen Adele indang kensep “25”-i pa jenjang ajatet, aser itemji ajanga Coldplay indang “A Head Full of Dreams” kensep temaba jenjangi atutsü nokdanga liasü.

BRITs dak alia Coldplay-i 2016 Super Bowl nung concert agütsütsü asoshi renemdagi.