Justin Bieber concert sabang nung ken ka dang tener alu

October 30, 2015: Norway yimtiba Oslo nung concert mapang Justin Bieber-i ken ka dang tener sabang nungi aluba ajanga lokti kanga jashia aser nüktzü yima toktsü. Pa ya küm asem shi mangatettep aika nung ajemoker tang kanga meranga pa sempet tajungtiba sayutsü merangba mapang ka lir.

Ibai mezüng masü saka tesüiba mapangtem nunga Canada nunger kentensang yagi sensaksem tom nung yamaisa toktsür ogo. Tawa tu pa dang asüngdangyaba maginüba ajanga Spanish interview ka tom nungi toktsür oatok.

Norway nung stadium sünga sentepa aliba nüburtem dang nenoki ni aginüba meinyakerji “Ni ojang-Ni iba concert magütsütsü” ta ashi.

Iba sülen Instagram ajanga pa sentong acha ayanger rongnung tekolakbai, “Pai timba ka mapa ka danga shitak meinyaker,” ta shia tatok meshiogo.

Justin-i, “Tan hopta ya ni asoshi kangasa majung lir, ni kanga anibelemogo aser iba den külemi concert reprangi arur tejaklen nokdakertemi ni aginüba ama meinyakba ajanga ni iba sentong tom nung anen,” ta ashi.

“Ni timba ka mapa aika shitak meinyakteter, ajisüaka ni tajungba akümtsü asoshi kanga merangdanger,” ta paisa ashi.

Iba aonung pa reprangi arurtem ajak stadium nung toktsür pa nija tayimtsü nung oatok.