Justin Bieber-i Hailey Baldwin den kibong akumtsü sangdong

Washington (United States), Mongputeni/October 12 (Agencies): Nüngtugu kentener, Justin Bieber-i pa Hailey Baldwin den kibong akumtsü atema sangdongogo, ta osang ka ajanga metetdaktsü.
Justin Bieber aser Hailey Baldwin na tawa New York City courthouse nung aniasünga liasü aser tawa tena Stratford Perth Museum, Ontario, Canada nung külemi angu, ta US Weekly osang ajanga ametetdaktsü. .
Justin Beiber nüngtem nung tetushi agüja yangluba museum semdangtsü atema tena Ontario-i ao, aser iba dak sendakba nung museum indang official Instagram page ajanga, “Justin-i Hailey ji pa kinüngtsü ta metetpelaja liasü,” ta metetdaktsü.
Bieber nüngtem nung yangluba exhibit, ‘Steps to Stardom’ ji taküm Tsüklai/February ita nung lapok aser iba museum nungji pa temaba jenjangi tua nüngtugu akumba mapang nung pai asemba tsüngsem, süoshi, hockey jacket densema süoshi aika den taoba mapang US Tir kinüngtsü, Michelle Obama-i sign sua aliba shidi-a ka densema lir.
Arishi küm 21 model, Hailey Baldwin-i museum nung aliba blackboard ka nung sign süa toktsüba den külemi lai pa meimsang atema “Ni na teti meimer’ ta zülua toktsü.
Museum indang Instagram post nung yamai lemsatep, “Yashi tetushi tejaoker anati museum semdangba atema onok kanga pelar.”
Tamalen Justin-i Stratford nung aliba tetsü-tebou nunger den külemi iba museum semdanga liasü.
Taküm Chiteni/July ita nung tenati Bahamas semdangba mapang nung tena aniasünga liasü.