Justin Bieber-i pa nüktzü aluba tetetzü ashi

September 03, 2015: August 30 nü MTV VMAs sentong temer küleni Justin Bieber-i pa kechiba nüktzü alu ibaji rasaa ashi.

Pai ashiba agi iba sentong nung pa shilem agidang nüburtemi kangabo pela magizüktsü amai bilem saka pai bilemba tai asü aser ibaji ajanga pa nüktzü alua liasü.

Mongolbar nü pa Jimmy Fallon den jembiba mapang, Jim-i pa dang kechiba nüktzü alu ta asüngdanga liasü.

“Ni shilem agiba mapang nüburtem ajaki kanga sapua nungitsü ta ni meimla…iba mapangji ni asoshi kangsa jangratem mapang ka liasü,” ta arishi küm 21 tain, Beiber-i Jimmy dang langzüa liasü.

“Shitakba nung parnoki ni yamato ajungketa amshitsü ta ni meimla, taoba mapang award agütsüba sentong ka nung nüburtemi ni mesapui liasü,” ta pai shisem

Tesüiba Deobar nü VMAs sentong nung pai ken aika agi ka küma yangluba ken ka tena liasü.

Iba ken nung pa meyong single ‘What Do You Mean?’ den kensep tasenba nungi ken kar enoka lir.

Pa indang kensep pezübuba aser tang tasenba kensep ya November 13 nü sayatsü sentong lir.

Taoba mapang nüburtem ajaki meteta mangatettep kar atalokba ajanga iba kensep nung temelenshi adokdaktsüogo aser ibaji ajanga ano kensep tenüng memetetdaktsür, ta pai ashi.

“Iba kensep asoshi ni kanga meranga inyakogo. Ni kechi kümner ibaji akümtsü asoshi ni kanga meranga inyakogo. Tensa tamajung kar agi amshiba ajanga nisung ajaki ni reprangdar amai ni bilemer aser ibaji ni melenshidaktsütsü asoshi ken nung zülusema lir. Anungji iba ken ajanga ni shilem agiba tatemlen kanga temulung shiranga liasü,” ta paisa ashi.