Justin Bieber indang ‘Sorry’ ken UK chart top 1 nung lir

November 22, 2015: Tan hopta UK singles chart tarensen nung Justin Bieber-i atenba ‘Sorry’ ken mezüngbuba jenjang nung lir. Iba ken UK chart-i yir hopta pezü jungogo aser hopta ana tashi tanabuba jenjang nung liasü. Tang ‘Sorry’ ken mezüngbuba jenjangi atuba ajanga chart otsü tasen ka yangluogo.
‘Sorry’ ken ajanga tesüiba hopta, chart 104,000 tashi ayok. Iba ken ya arishi küm 21 tain, Bieber indang ‘What Do You Mean?’ ken sülen tanabuba UK chart-i aiba lir.
Tan hopta pa indang ken chart-i aibaji iba ya dang masü. Chart nung temaba pongu nung pa ken asem tashi densema lir. Canada nungbai atenba ‘Sorry’ ken top 1, ‘Love Yourself’ ken top 3 aser ‘What Do You Mean?’ ken top 5 nung lir.
1981 küm John Lennon asüba sülen pa indang ‘Imagine’, ‘Happy Xmas (War Is Over)’ aser ‘(Just Like) Starting Over’ kentem chart nung temaba pongu atongba sürbo tang Bieber dak alaka küm 34 tsüngda tebur kentener shingaia iba ama takok majurudangi liasü.
Bieber indang ‘Purpose’ kensep nungi ken ajak chart top 100 nung lir. Item rongnung ken 8 tashi top 40 nung ia lir. Nisung ka kija ken paika ya top 40-i aibaji tang mezüng lir.
Adele indang ‘Hello’ ken top 2 aser X-Factor nung tanabuba jenjang nung takok angula, Fleur East indang ‘Sax’ken top 4 nung lir.