Justin Timberlake-i ‘Can’t Stop The Feeling’ ken indang video sayaogo

May 07, 2016 : 2013 sülen Justin Timberlake-i tan mezüngsüa ken tasen ka adokogo aser iba ken ya tang teyangludak DreamWorks ‘Trolls’ animated movie nung amshir.
Justin Timberlake-i ‘Can’t Stop the Feeling’ ken sayaba mapang pai ano kensep ka yangludar, ta metetdaktsü.
Tesüiba mapang NSYNC kentener telok nung dena alisang, arishi küm 35 tain, Timberlake-i iba ken tasenba ya May 5, 2016 aonung menur saya aser iba video nung DreamWorks Trolls movie nung adoktsü aliba nisungtem animate sür adoka lir. Iba film ya November 4, 2016 nü sayatsü sentong lir.
Grammy award angusang Timberlake-i iba video kanga tatsüka pa indang official twitter account nung inoktsüogo. Iba video nung tsüngsanger telok aser film nung shilem agirtem animate sür adoka lir. Iba film nung ola balalaji Gwen Stefani, Anna Kendrick, James Corden, Kunal Nayyar, Russell Brand aser Icona Pop nungeri adoktsür.
Iba film nung Justin Timberlake-a tongti shilem agir ana rongnung ka lir aser pai Branch indang ola adoktsür.
2015 April ita nung kinungtsü Jessica Biel tena, jabaso Silas agi sosema kümogo aser pa tebu ka akümba sülen pai tan mezüng ken tasen sayar asütsü.
“Tangbo tapu ajak akhidang ama masü kümogo. Kidang tanur ka aliba ajanga ajak melenshiogo!” ta pai par jabaso ita 13 tain atema jembiba mapang ashi.
“Ni azü scü aokdang science project inyaker ka mesüka bilem ajisüaka ozü tanur scü aokdangbo ni dena amoka amshir. Ner tanur scükipong merüka yutsütsübaji kecha agia menokdangtet!” ta pai shisem.