Justin Timberlake ken ka agi okadaki jaoktsüsa aküm

New York, April 1, 2016 : Kentener Justin Timberlake-i “Don’t hold the wall” ken mejema atenba atema pa okadaki aotsüsa kümogo.
2013 küm Justin Timberlake-i adokba “The 20/20 Experience” kensep nung “Don’t hold the wall” ken, Canada nung entertainment company Cirque du Soleil den masüngdangtepi parnok indang ken ka nungi agizüka mejemba atema, Grammy award angusang kentener Justin Timberlake anema ken o ka benokogo, ta variety.com ajanga metetdaktsü.
Timberlake-i “Steel dream” ken nungi agizüka mejemba kenji shitakbabo Cirque indang 9buba stage production nung atenba ken lir ta company-i pa aitsüogo.
Iba ken o ya federal court nung Brihostibarnü benok aser copyright raksatsüba atema parnoki Timberlake dang sen dollar 800,000 meshia zülua lir.
Timberlake aser “Don’t hold the wall” ken yaritepa zülur J-Roc aser James Fauntleroy na den Sony Entertainment, Universal Music aser WB Music Corp company tema Cirque company-i benokba ken o nung amsema lir.
Timberlake ya 1970s mapang tentetba rhythm & blues kentener telok ‘Sly, Slick & Wicked’-ia pai atenba “Suit & Tie” kenji parnok indang ken “Sho’ nuff” nungi agizüka yangluba lir ta taküm küm tetenzüklen ken o ka benoka temonok meshia liasü.
Iba sülen February ita nunga ibala mesükba ken o ka atalok, koba ajanga pa Will.I.Am den lungjemer atenba “Damn girl” kenji Perry Kibble meyong “A new day is here at last” ken nungi agizüka yanglu, ta ashi.