Juvenile Justice Act agizükogo

New Delhi, January 16 (Agencies): Juvenile Justice Act tasenba agizükogo, aser iba Act kübok school, orphanage, hostel mesüra tanurtem anepaluba reju balala nung tanurtem dak teka aser süng amshia temerenshi agütsürtem ita asem tashi tepouktak ayutsü mesüra pei mapa nungia agientsü aser senchi achitsü.
Iba Act ajangasa tashiyim amshia raksatsüba, nisung tepsetba aser acid amshia amakba ama ken o tulu nung aibelenertem arishi küm 16 ser temapurbo tain ama ken o akatsü. Iba Act ya Hokolbarnü nungi mapa küma benokogo.
Juvenile Justice (Care and Protection of Children) Bill ya Rajya Sabha nung agizük aser December 31, 2015 nü Tir-i agizüka liasü.
Juvenile ozüng kübok tang tashi nungbo, ken o tulu nung aibelener tanurtembo Juvenile Justice Boards-i dang ken o kaa liasü aser nisung melenshitsü ‘home’-i dang yoka liasü. Ajisüaka Act tasenba ajanga Juvenile Justice Boards-i mezüng bushisüngdangtsü aser atangji, tanur jagi ken o tulu nung aibelener asü, ta kuli bushitsü melar.
December 16, 2014 nü Delhi nung tebur telok kati tetsür ka tashiyim amshia raksatsüba sülen tepsetba tatalokba sülen linük nung aikati, ken o tulu nung aibelener juvenile tem-a tain ama ken o kasa akatsü takhangba agüja liasü.
Tanurtem anema aibelenba tapu balala aika tangbo Act tasenba nung züngokogo. Item rongnung ozüng alema pei chir ama agitsü atema tanur alizükba mesüra agiba, tanurtem dak teka sangshia temerenshi agütsüba, telungpur teloktemi tanurtem amshiba, tangar memenepba tanurtem anema aibelenba aser tanur apuba densema lir.
Iba ozüng ajangasa Women & child development (WCD) ministry-i benokba mapatong-foster care, adoptions aser lajartem reprangba nung ozüng tasentem latetja lir.