Juventus teloki Italian Super Cup takok marok agizükogo

Juventus telok asayartemi Italian Super Cup takok marok Shanghai nung agizükba sülen pelatepba noksa nung angur. (Shanghai, August 08) 

Shanghai, August 08 (Agencies): Italy nung tentetba Juventus teloki goal 2-0 agi Lazio telok madak final asaya akokba sülen Italian Super Cup takok marok Shanghai nung tanü Honibar nü agizükogo.
Tan asensa anioksemba asayar ana, Mario Mandzukic aser Paulo Dybala nati tanü asaya tanabuba shilem nung goal ka ka agüja par telok asoshi takokbaji bener arutsü.
Tan agizükba ya densema Juventus teloki küm 4 tsüngda nung Super Cup takok marok 3 buba agizüker lir.
Lazio teloki asaya mezüngbuba shilem nung Juventus telok den tajungba asaya saka par teloki goal ka dang magütsüteti telok anaprongla kasa jenjang nung lia mezüngbuba asaya shilem tembangadok.
Asaya tanabuba shilem nung, asaya tenzüker minute 69 buba nung taküm June ita Atletico Madrid telok toktsür Juventus nung züngsemsang, Manduzkic-i külem asayar Stefano Sturaro-i yanglutsüba cross ball kanga junga agizüka par telok asoshi mezüngbuba goal agütsü.
Croatia nunger Manduzkic-i mezüngbuba goal agütsüba sülen par teloki tanabuba goal-a takok ngua agütsütsüa pai cross ball tajung ka asaya tenzüker minute 73 buba nung yanglutsü aser iba ball-ji külem asayar, Paul Pogba-i agizüka Argentina nunger Dybala nem tanabuba goal takok ngua agütsütsü maongka yanglutsü.
“Ni Juventus telok tenüng nung mezüngsüa asayadang takok ngua goal agütsüba atema kanga pelar aser iba takokba ya ni kodanga mamatsü,” ta Serie A nung densemba Palermo telok toktsür Juventus telok nung taküm June ita nungi tenzüka züngsemsang, arishi küm 21 tain striker, Dyabala-i takok anguba sülen metetdaktsü.