K Babu-i Kerala excise minister mapa tanaben agizükogo

Thiruvananthapuram (Kerala), February 01 (Agencies): Yi ayoker kiburtem dang nungi süpokrem agiba ken o nung Vigilance court kati FIR benoktsü tuyuba sülen anogo 9 tejaklen Congress lenir K Babu-i state excise minister menden tokja liasü, aser maneni tanü pa tanaben Oommen Chandy cabinet nung denogo.

High Court-i vigilance court tetuyubaji atsülangtsüba den külemi tang state sorkar tashi nung aliba Congress-i aniba teloktep UDF-i pa menden nungi alutsü menüngdaker ta lemtetba sülen pa tanaben cabinet nung denogo.

January 23 nü Babu-i minister menden tokja liasü. Pa ya Tripunithura assembly nungi lir aser tang mezüng minister inyaker lir.

Yi ayokba dokan ochimashi ken o nung Kerala High Court tetuyuba nung Kerala Congress(M) tongti, K M Mani Finance Minister menden nungi anenba sülen ita lir Babu-a minister menden nungi anena liasü.

Assembly election agitsü aliba state Kerala nung minister temi atongatonga menden toktsüba ajanga UDF sorkar anokshidar.

Kerala Bar Owners Association Tir, Biju Ramesh-i yi ayokba dokan license tem renew asütsü atema Babu nem süpokrem crore 10 agüja liasü, ta tai tongloktsü.

Ajisüaka Congress lenir Babu-ibo, “CPI (M) (opposition)-i yi dokan kiburtem den senteper tasa tamajung yanglua ni anema apusoogo. CPI (M)-i parnok dang, par party sorkar tashii tanaben arura parnoki tanaben yi dokantem lapokdaktsütsü ta nangzüka lir,” ta tamalen jembia lir.

Iba ken o benokba sülen court-isa, süpokrem agütsübajia ozüng alema lir ta shia Ramesh anema-a ken o benoktsüla, ta tamalen tuyua liasü.