K.G. Kenye-i India Tir Ramnath Kovind den ajurutep

Dimapur, Luchii (December) 21 (TYO): Nagaland nungi Rajya Sabha MP K.G. Kenye-i tawa tu New Delhi nung India Tir Ramnath Kovind den ajurutepa state aser NE dak sendakba onük aika lemsatep.
1942 küm British sorkari Quit India Movement ama nüjiso atema inyakba mapa noktangtsü atema Arm Force Special Powers Act (AFSPA) yanglu. 1948 küm APSPA ya ‘Ozüng tesashi’ ta züngshi aser United Nations züngsemtem den iba ozüng benoka jembi. Geneva Convention nung iba ozüng indang jembiba sülen India nung iba Act mamshitsüla ta telemtetba agi aser India-ia iba bangzüng nung sign asü. Ajisüaka, iba bangzüng agiba sülen küm 10 India-i Nagaland nung iba ozüng alitsü agüja lir, anungji Nagaland nungi AFSPA agientsüla, ta Kenye-i India Tir dang ashi.
Paisa Arrla 371(A) indang lemsatepdang, “Linük Temzüng ajanga Nagaland state nem temeten balaka agüja aliba alema meinyaktsüla. Centre-i iba Arrla ya mapa küma meinyaker anungji Tir-i Nagaland nung ali rongsen aser talisa Oil & Natural Gas atsüteta agitsü atema tiyongtsüi ia mapa inyak nung junger” ta ashi.
1972 küm Bangladesh linük kümteta aoba sülen Zonal Council agien aser North East Council tentet. 1945 II World War, 1962 Chinese Aggression aser 1971 East Pakistan war tem Eastern Region nung atalok, kechiyong iba tesem ya linük 5 agi meketbanga lir. Anungji, iba Administrative Centre ka alitsü nüngdak, kechiyong 1960-72 tashi Nagaland ya External Affairs Ministry kübok liasü, ta Kenye-isa India Tir dang ashi.
NEC tentettsü atema sentong yanglu aser iba atema Parliament nung house anaprongla nung Act ka agizük. Anungji, NEC ya Research Institute ka ama kümdakja jenjang ajemba ajanga Centre-i mezüng shisadanga yangluba ajembangtsütsü. Shitakba agibo NEC ya jenjang temabai ajungkettsüla, ta paisa metetdaktsü.
Indo-Naga yimten tebilemtsü ya küm aika jembia arur aser tang olemtep tajungba nung agidar. Anungji, onoki India sorkar dang maongka tajung agia, ajaki agizüktsüa telemtetba ka agitsü ayongzüker, ta Nagaland Rajya Sabha MP-isa ashi.
Paisa India Tir Ramnath Kovind dang Nagaland state nung International Airport tajung ka yanglutsü mepishi aser idangji Tir-ia iba mapa ya tongti süa inyaktsü nangzük, ta PRO to MP sangdong ka nung ashi.