K. G. Kenye Rajya Sabha candidate asütsü shim

Dimapur, March 02 (TYO): March 02, 2016 nü Central Office H.Qs. Kohima nung NPF Central Working Committee senden amen.
NPF tir, Dr. Shürhozelie Liezietsu-i temoatsü meshia sarasadema senden tenzük aser pai Working Committee indang teinyaktsü aser maparen metetdaktsü.
Asür MP, Khekiho Zhimomi-i toktsüba Rajya Sabha menden atema party candidate shimtsü asoshi tanü senden ayongzüka amen aser iba mapang NPF Tiri candidate 11 indang tenüngtem telok dang zünga metetdaktsü.
Senden nung Rajya Sabha atema tenüng meshimdang Chief Minister, T. R. Zeliang-i Central Working Committee züngsemtem dang candidate shimyim indang onük kar metetdaktsü.
Candidate ji party sülen anidaker tajung ka asütsüla, kin dak merangloki sempet alir ka shimtsü, aser Indo-Naga onük atema kanga dang tongtipang mapang ka nung mapa junga inyaktsü ta ajitetba nübo ka shimtsü atema TR Zeliang-i tesentepertem ayongzük.
Iba sülen WC züngsem 12 aser Special Invitees nisung 4-i Rajya Sabha Candidate shim aser iba mapang K. G. Kenye pusema vote 13 liasü.
Working Committee senden amenba sülen DAN Co-ordination senden ka jatep aser iba nung DAN Co-ordination Committee Chairman-i telok dang Working Committee telemtetba metetdaktsü. Iba mapang BJP züngsemtemia WC telemtetba mulunga agizük.