K P Oli Nepal Ato Kilonser menden nung aluogo

Kathmandu, July 24 (Agencies) : Nepal Parliament nung linük yimsüsübaren kanga mejungi asongoka iogo ta ashiba sülen Nepal Ato Kilonser K.P. Sharma Oli-i pa menden toktsütsü shidi ka Deobarnü zülua agütsüogo.
Pai züluba shidiji linük Tir Bidhya Devi Bhandari nem la office nung agütsü, ta ketdangsertemi ashi.
Parliament nung pai aniba sorkar dak temulung malemer ta ashiba o langzüba mapang pai Ato Kilonser meden toktsütsü indang osang metetdaktsütsü akok.
Linük nung küm tatem budget dak sentakba bill asem tashi magizükba sülen pai aniba sorkar dak temulung malemer ta asüba nung Nepal Parliament-i Hokolbarnü olemtep tenzüka liasü.
Oli-i aniba sorkar den lokteper aliba aser par sorkar atema kanga dang tongtibang telok, Communist Party of Nepal (Maoist-Centre)-i tan ita tetenzüklen parnok doktsür oli ano budget dak sentakba bill tem magizükba ajanga Oli’er sorkar atema tebilemtsü tulu kümogo.