K.T.Villie ji Angami nungeri shimba lenir:AYO

Dimapur, February 14 (Agencies) : February 13, 2017 nü state osangkaketem nung “NPF reacts to tribal bodies; 4 MLAs” ta sür adoktsüba sangdongji NPF Central-i tanuri jembiba orep mesük aser tetetzü maketba jelushi ka amai lir ta Angami Youth Organization (AYO)-i kanga menünüa süngmanger, ta AYO media cell sangdong ajanga metetdaktsü.
Kechiba temenünütsüka süra, tang state tensa majungba ya state nüburtem ajak senteper sorkar anema nokdaker ta NPF-i ano mangatet, ta AYO-i ashi.
Sangdong nung ashiba agi, asen nüburtem temeden kümzüka aser wazüka ayutsü asoshi, kanga akhümtsübua aliba, Naga kin tentet aser telok balala-i meranga inyakba ajak asayamnü jelushi ka aier ta NPF central-i taka-maki aser metsübui jembir.
Sorkari aibelenbatem, parnoki pei ajangzüktsü asoshi inyakba aser telemsa adokdaktsüba anema nüburtem ajak lungjemer sorkar manokshitsüteter ta NPF Central-i tebilemba yur kazüba ajanga tanü parnok shingaia mezüngshi kümogo, ta sangdong nungji shia lir.
Iba amala tatalokba ya alima ajak nung nüburtemi tanginüba kar akhangdang ajangshia arubatem lir. Nüburtem olaji temai madokiang malitsü. State sorkari tang ya state nung azü dena tokshija aser olulu tapu aika proka Hitler Nazi Germany tensa mesüka inyaker, ta kasa sangdong ajanga ashi.
APO nung Tatong Tir aser tang NTAC convener, K.T.Villie aitsüba ajanga onok kanga mepelar kechiba süra pa ya khen mapang ka nung taoba mapang state chief minister ka indang PS inyaka liasü.
AYO-i, NPF central-i K.T.Villie ya Angami aser NTAC teloktem nung lenitsü asoshi Angami nunger rangbeni shimtetba lenir lir ta metetang. Anungji, pa aitsübaji onok chitepa aitsüba aser Naga nunger rangben aitsüba den saku, ta metetdaktsü.
Sangdong nungsa, parnoki adoktsüba sangdongji kecha tagitsü mali anungji ibaji tazüngla lir. Ibai ajanga tang ataloka aliba tensa atema parnok shisa makaba tali jangjadaktsür, ta shia lir.
AYO-i, Parnoki temulung nung ajungtsü amai bilemba aser nüngdak makaba otsü kanga proker. Tang nüburtem nokdakba inyakyim nung political inyakyim kecha densema mali ta ano lepshia metetdaktsür, ta sangdong ajangsa metetdaktsü.