K. Therie-i asür Medose Richa mang ayimer

Dimapur, November 15 (TYO) : 14 Southern Angami ACCC President aser taoba Jakhama Village Council Chairman, Medose Richa asüba osang angashia kanga jashir, ta NPCC President, K. Therie-i sangdong ka nung metetdaktsü.
Asür Medose ya Congress pusemer tajung ka aser kanga dang nendaka party mapa inyaker ka liasü. Pai loktiliba asoshi kanga bilemja mapa inyak aser lipoküm wazüka ayutsüba atema mapa inyakba nung pai tongti shilem agi, ta NPCC President-isa sangdong nung ashi.
Pa asüba ajanga Congress telok nung lennir tajung ka samaogo aser pai toktsür aoba ongdangji memelentettsü. Ni Congress telok ajak tenüng nung tasür kibong den asüku lemsateper aser Tulusang Tsüngremi nenok nem tesünep agüjang ta sarasademtsür ta K Therie-isa shisem.