K Therie-i Congress tir menden toktsünür; AICC-i lemtettsü

Kohima, Metsüremi (March) 10 (TYO): Nagaland Assembly election nung menden ka nung danga takok mongutetba atema tenüng agia Nagaland Pradesh Congress Committee (NPCC) tir K Therie-i menden toktsütsü shiogo.
Küptoknü (Honibar) Congress Bhavan nung NPCC executive senden amendang Therie-i menden toktsütsü atema benok, ta osang ka ajanga angazüker.
Iba senden nung State Congress lennirtem, District Congress Committee aser kongsang balala nung tirtem den Tsüklai (February) 27 nü State election nung toktepba INC candidate tem aden.
13 buba NLA indang election nung Congress-i menden 60 nungi 18 nung toktep saka menden ka nung danga takok mangu.
Tsüklai (February) 6 nü Congress-i candidate 23 tokteptsü ta osang metetdaktsü saka senotsü peria maliba atema candidate pungui tenüng meyipa agi.
2003 küm nungi Nagaland nung Congress jenjang mejungi aküm. Iba küm parnoki menden teimba nung takok angu saka sorkar mekümtet aser iba sülen kümsük asem tashi opposition nung dang liasü. 2008 election nung parnoki menden 23 nung takok nguteta liasü.
2013 assembly election nung Congress-i menden 8 nung takok angu aser opposition liasü saka Yimpoksüi (November) 21, 2015 nü Congress MLA ajak Naga People’s Party (NPF) nung aden.
Nagaland nung Congress tir ka ama tamakok anguba atema tenüng agia Therie-i menden toktsütsü osang metetdaktsü. Ajisüaka, pa ya All India Congress Committee (AICC) ajanga shimba liasü aser iba jagi pa menden nung anentsübaji NPCC ajanga masü saka Delhi nung AICC dang abentsüla, ta party osang ka ajanga ashi.
Therie-i tir menden yutsüba indang shidiji AICC ajanga dang telemtetba agi. Tentonü pa Delhi-i oa Party high command den ajurutepa shidiji agütsütsü akok, ta osang ajangasa shisem.