K. Therie-i Mokokchung nung Congress Party workers den senden amentsü

Dimapur, August 17 (TYO) : NPCC President, K. Therie-i NPCC ketdangpur kar den hopta ka atema Kiphire, Shamator, Tuensang aser Mokokchung sema senzür, ta District Congress Committee Mokokchung, President, Imkongyanger aser General Secretary (Admn), P. Aley nati külem sangdong ka nung metetdaktsü.
Iba sentong ya August 16 nungi tenzük aser NPCC ketdangpurtemi College azüngertem, Tribal Hoho aser Party züngsemtem den ajurutepa senden amentsü.
Centre sorkari sen crore aika agüjaka Nagaland nung gari lenmang tia mejungi aliba, ochimashi inyakba, backdoor appointments ajanga Kaketshirtem tia raksatsüba amala onüktem benoka olemteptsü, ta sangdong nung shia lir.
Shamator nung K. Therie-i Tribal Hohos den ajuruteptsü aser iba ya ya February 6, 2016 nü Shamator kübok Yayi apu nung apuani ka tepsetba atema Goodwill” Mission ka ama asütsü.
August 19, 2016 nü NPCC President-i Mokokchung nung ACCCs, DCCs, Frontals aser Senior Congress lennirtem den senden ka amentsü. Iba sendenji anepdang 10:00 ako nungi DCC office nung amentsü. Anungji züngsem ajak medema arua adentsü metetdaktsür, District Congress Committee Mokokchung mendenpurtemisa sangdong nung ashi.