Kaala film nung Rajinikanth indang jeep museum nung ayutsü akok

Chennai, May 30 (Agencies): Nüngtugu actor Rajinikanth-i taruba Tamil film ‘Kaala’ nung amshiba jeep ya shishilembar Anand Mahindra nem film yanglu tembangba sülen agütsütsü, ta iba film producer Dhanush-i ashi. Iba jeep ya Mahindra-i auto museum ka lapoktsü asoshi sentong aliba nung ayutsü asoshi agütsütsü. Kaala film ya Pa-i direct asüba film lir.
Anand Mahindra ya Mahindra group nung Executive Chairman lir aser pai Kaala film nung Rajinikanth-i amshiba jeep ya collector’s item ka ama pa indang auto museum nung yuner.
“Kodang nüngtugu nisung Rajinikanth amai gari ka chuba menden amai amshidir iba ji nüngtugu akümer. Shibai iba gari kong aliar kari danga metetra onok nem osang agüjanga. Ni iba gari ya company museum atema aginür,” ta Mahindra pa indang Twitter page nung zülutsü.
Pai iba den külemi Rajinikanth jeep nung mener aliba iba film nungi noksa ka inoktsü.
Iba Twitter nung telangzüba agüja Dhanush-i yamai zülutsü: ” Iba gari ya tang Rajinikanth-i tamshidak lir. Film tembangba sülen nü ket tongtsütsü.”
“Iba ji kanga dang osang tajung. Nai langzüba atema kanga pelar,” ta maneni Mahindra-i langzü.
Twitter amshirtemi Mahindra dang museum indang asüngdang dang pai yamai telangzüba agütsü: “Musuem lapoktsü asoshi sentong lir aser garitem bendendar. Iba museum ya Kandivli, Mumbai nung lapoktsü akok.”
Kaala film ya tang Munbai nung tetangokdak lir. Iba film nung Rajinikanth, Anjali Patil, Nana Patekar, Samuthirakani aser Sakshi Aggarwal nungeri tongti shilem agir.