KABA care ministry-i lipoküm asentenshitsü ayongzük

Dimapur, September 8 (TYO) : Kohima Ao Baptist Arogo-i lipoküm asentenshitsü atema (KABA CARE) “Tsüngremer Lima Anepaluba” inyakyim dak ajemdaker lanurtemi jila tobur junga color atep aser ano anagteta alirtemi jila merükmejua Tsüngremi yangluba lima tobur junga kümdaktsü.
Naga Blog team-i temeim aser anepalu mapa tali awa oa inyaktsü atema onok ajungmesoba atema KABA CARE-i parnok dang pelaba lemsateper.
Tetsükdaktsü jenti ajuruaka onoki inyaktetba tilateri ajak nenoki wazüka aser kümzüka ayutsü atema meranga inyakba ajanga onok kanga pelar aser Tsüngremi yangluba kechisarena anepaluba mapa nung onok shilem lir ta tali jangja angateter.
Temulung ajak agi aser tangatetba tajung alirtemi nungita yariba ajanga KABA CARE asemnü atema Mokokchung-i Tsüngrem temeim lemsatepi aotsü sentong renema lir. ‘KABA CARE Mokokchung Chapter’ omen kübok KABA Lanur 35 September 09, 2016 nü Mokokchung-i apusotsü.
Mokokchung nung asemnü lipoküm merüka ayutsü atema sentong agidang jila nung merükmeju mapa inyaktsü, teshimtet tesem kar nung colour ateptsü, green concert sentong ka akatsü aser bookmark o car sticker campaign-a akatsü. Iba den külemi onoki jila nung aliba Arogotem nunga tekülem sentep agitsü.
Mokokchung nung aliba nüburtem aser temulungertemi meteta alitsü atema sentong telemsa yamai agütsür:-
September 10, 2016 anepdang 6:00 ako nungi tenzüka Süngkomen nungi Imkongmeren Sporting Complex (Public ground) tashi Green Marathon asemtepba alitsü.
Iba sülen agüja aliba tongtibang tesem pezü nung merükmejua amongtsü-
1. Süngkomen  BOC  tesem
2. Main Police Point
3. Imkongmeren Sporting Complex aser
4. Ngati Sewak Gate.
Tejangrartemi na anasatiba tesem nung shilem agitettsü.
September 10, 2016 nikongdang 6:00 ako nungi Mokokchung Town hall nung Green Concert sentong akatsü.
Mapa tajung ka atema iba concert ayonga akaba mapang jila aser anasa aliba tesemtem nungia arua dena lungjemba ajanga tepela anguba ajangshitsü atema KABA CARE Youth Ministry-i pelashishia jaoker.
Onoki Nagaland merüka aser tobur tajungba kümdaktsüba mapa inyakdang Tsüngremi Pa nüburtem longjemdaktsütsü onok tamang sarasadem. Ano anünga aliba district tem nunga iba Mission inyaktettsü atema onoki sarasademer.