KABA CARE Ministry-i lipoküm wazüktsü Kohima Marathon ayongzük

Kohima, June 5 2017 (TYO) : KABA CARE-i ayongzüka tanü Alima inti Lipoküm Anogo nung lanurtem aika Kohima marathon nung shilem agia asen lipoküm wazüka ayutsü asentenshia ayongzük
Kohima Ao Baptist Arogo indang CARE (‘Creating Awareness for Restoration of Environment’) Ministry-i achayanga iba Kohima marathon agiba ajanga nüburtem rongnung Kohima merükmerük ayutsüba tayongzükba agütsü.
Iba marathon ya “lipoküm den Tsüngremer meimchir tali sendaktepba akumba”nung ajemdaker ayongzük; aser PHQ junction nungi tenzükba civil secretarit junction nung tembang. KABA fellowship 7 nungi Lanur 70 dak tema aser tanga arogotem nungi kar ta densema iba marathon ya takok ngua asemtepogo.
KABA Pastor Tiatoshi longkumer ajanga okila shia iba marathon lapoktsü. Iba marathon ajanga Kohima yimtiba nung alir nem Kohima merüka ayutsü tayongzükba agütsüner ta paisa shisem. Lipoküm aser tasemteper atema KABA Youth Evangelist Bendangsunep Imsong den sarasadem.
Iba KABA CARE Ministry ya 2015 küm tenzük aser nübur ajak arok ser shilem agiba ajanga asen lipoküm wazüka ayutsü aser talisa Kohima merüka ayutsü atema lir.
Town Fellowship nungi Temjenyanger Imsong aser Ministers Hill fellowship nungi Lanumongla Jamir, tenati tebor aser tetsür tem rongnungi mezüngbuba jenjang ngua liasu.
Tasemteper ajak nem Khuli kaket tajung den senpet agüja tembang.