KABA-i Kohima nung merükmeju mapa inyak

Kohima, July 3 (TYO) : Honibarnü Kohima Ao Baptist Arogo (KABA)-i state yimtiba Kohima nung merükmejuba mapa tulu ka ayongzüka inyakogo.
Kohima nung süngdonglidong tali atemtsü aser merükmejutsü nükjidong nung KABA-i ‘Creating Awareness for Restoration of Environment’ (CARE) sentong tenzüka lir aser Honibarnü inyakba mapaji iba sentong kübok inyak.
“KABA CARE ya Kohima nung alirtem dang lipoküm kümzüka aser wazüka ayutsü tangatetba agütsütsü atema tongti süa inyaker. Kohima nung lipoküm wazüka ayutsü aser temerükba kümdaktsütsü atema iba mapa inyaker” ta KABA youth director, Tiatoshi Longkümer-i ashi.
Ano, KABA CARE convenor, Lipoksungkum Imsong-ia, KABA CARE maparen ajanga Kohima-i Smart City tenüng anguba nung teyari agütsütsü imlar, kechiyong KABA nung züngsemtemi pei tajungtiba agi Kohima tobur tajungba kümdaktsütsü meranger, ta ashi.
Tang KABA CARE ajanga Kohima nung pedestrian footbridge 4 yanglushia anepalur.