KABA lanurtemi Clean Election sentong ayonga agi

Kohima, September 09 (TYO): Tanü nikongdang Kohima Ao Baptist Arogo (KABA) Youth Ministry-i tarutsü nung asen lima yanglushitsü nükjidong nung election merüka agitsü osang proka Kohima yimtia süa jajaba den o toktepba sentong agia liasü.
KABA lanurtemji Old MLA hostel junction nung ozülu balala bener adenshia liasü. Ozülu rongnung ‘Ni Khristan ka, iba sülen ang vote agütsür ka’, ‘Telemsa adokdaktsüba Candidate nem vote magütsütsü’, ‘Nübur aser alima atema vote agüjang’, ‘Nü vote sen yong teyok’, ‘Ochimashi anentsü atema vote agüjang’, ‘Tsüngrem tsübuba aser ochishir lenirtem nem vote agüjang’ aser ‘Tangar melen vote tagütsü’ ta zülua liasü.
Iba sentong nung jembidang NBCC School Coordinator, Rev. Dr. M Savi-i, “Nagaland Baptist Church Council (NBCC)-i tenzükba Clean election mapatong ya Tsüngremer ministry ka lir aser tayongzükba tulu ka lir,” ta ashi.
Clean election mapatong ya takartem aser tashi nung alirtemibo maginütsüa makok, ta shia Rev. Savi-i, “Temetettsü kaji, asenok kanga merükteta alitsüla, asenok yangi adenshiba ya nisung ajak peladaktsütsü atema masü saka Khristan nütsüng timba aliba state nung Naga nunger atema tim teinyaktsütem inyaktsü atema lir,” ta ashi.
KABA youth ministry-i iba ama sentong tajung ayongzükba atema tenüngsang agüja Rev. Savi-i denomination balala nungi süaka tanga Arogotem nungi youth department danga iba mapatong tejakleni bener aotsü atema ayongzük.
“Yangi asenok aliba lima nung Tsüngrem yimli amenoktsü atema asenoki asen teinyaktsü shilem inyakdi,” ta paisa ayongzük.
Old MLA junction nung sentong tatsüka agiba sülen lanurtemji The Heritage tsütsüleni yimyim ayima ao. Parnoki ‘Onoki lenir tajung aginer’, ‘Onoki oshimashi anema nokdaker’, ‘Onoki election merüka agidaktsüner’ ta yimyim ayim.
KABA Youth Director, Tiatoshi-i, “Iba rally ya clean election mapatong akasodaktsütsü atema ayongzük; aiben asenoki Tenla kidang jembiba dang serbo anenadoker, anungji yimti lenmang nung nüburtem dang clean election osang sangdongtsü atema iba sentong ayongzük,” ta metetdaktsü.