KABA & MTBA na lungjemer Mkg nung asemtepba, merükmejuba aser kenten sentongtem akatsü ayonger

Mokokchung, Sept 5 (TYO): Tan September 10 nüji ‘Caring God’s Own World’ omen nung ajemdaker asemtepba (Marathon), merükmejuba (cleanliness drive) aser tekülem aonung (worship night) ta ser kenten sentongtem yangi Mokokchung nung akatsü ayongzüka lir, ta osang ka ajanga metetdaktsüogo.
Iba sentong ya Kohima Ao Baptist Arogo (KABA) aser Mokokchung Town Baptist Arogo (MTBA) Mission Youth Ministry teloktem lungjemer ayongerba lir, ta osang ajanga ashi.
Marathon aser Cleanliness Drive maparenji Sept 10 nü anepdang 5:30 ako nungi Süngkomen BOC nungi tenzükbaji Imkongmeren Sports Complex nung tembangtsü. Tasemteper rongnung 1st & 2nd senpet agütsütsü aser tetsür/tebur telemsa alitsü, aser iba sentong nung tejangrar ajaki arua shilem agitettsü akok, ta kasa osang nungsa metetdaktsü.
Inüjisa nikongdang 6:00 ako nungi tenzüka Mokokchung Town Hall nung tekülem aonung ta ser kenten sentong ka akatsü renema lir, anungji, yimti telungtet nung alirtem talisa lanurtem ajaki asen libajen anebaluba sentong nung arua shilem agitsü asoshi parnokisa ayongzüka metetdaktsü.