Kabir Bedi-i Hillary Clinton pu asemer

Mumbai, November 06, 2016 : India nunger film actor tejen, Kabir Bedi-i Democratic party nungi US Tir menden atema toktepla, Hillary Clinton pu asemer aser US nung tetsür Tir ka shimba ajanga linük nükla tongteta otsüsütsüsa temelenshi bener arutsü, ta ashi.
Kabir-i US nung taruba Mongulbarnü nungi tenzüka agitsü aliba Tir election nung Clinton takok angutsü imlaba Twitter nung lemsatepogo.
“US Elections 2016 nung Clinton-i takok nguangma! US nung tetsür Tir ka ajanga linük nükla tongteta otsüsütsüsa temelenshi bener arutsütsü. Iba election nung nia la den dena lir,” ta Kabir-i tweet asü.
Bedi-i Bollywood nung joko küm 40 dak tema shilem agia arur aser iba mapang pai nüngtugu film tem “Khoon Bhari Maang” aser “Talaash: The Hunt Begins…” nung shilem agia lir.
Pa bendang linük nung mezüng shilem agiba film ji Italy nunger TV series “Sandokan” liasü.
Arishi küm 70 tain, actor Bedi-i ano international film “Octopussy” nunga shilem agia lir.
Kabir-i tesüsa shilem agiba Bollywood film ji Hrithik Roshan aser Pooja Hegde nati tongti shilem agiba film “Mohenjo Daro” lir. Iba film ya Ashutosh Gowariker-i direct asüba lir.