Kabir-i Central Board of Film Certification aitsü

Mumbai, February 25 (Agencies): Farhan Akhtar, Shyam Benegal aser Ashoke Pandit nunger sülen, film yanglur Kabir Khan-i Central Board of Film Certification-i director Prakash Jha indang film ‘Lipstick Under My Burkha’ nem certificate magütsüba atema aitsüogo.
“Yamala tatalokba kanga bulua atalokba ya tebilemtsü ka lir. Film ka reprangtsübaji pei molung. Shingaia kangshia mereprangdaktsür, aser CBFC nung nisung ka anati lokti ajak atema telemtetba magitettsü,” ta Hokolbarnü short film ‘The Strange Smile’ sayaba mapang Kabir-i ashi.
“Asenoki India-ji ‘global power’ ta ashir, saka ‘global power’ temi yamai meinyaker ta nibo bilemer. Parnoki film ka ajanga asen tangatetba aser lokti raksatsü ta bilemer. Film industry nung inyakertemi pei temeten asoshi odia nokdaktsü mapang tongogo,” ta paisa ashi.
CBFC-i iba film nem certificate magütsütsüi nokdangba kuli agütsü: “Iba film ya tetsürtem dak rangloker, parnok taküm nung shi jangraba pungmangtem dak ajemdaker yangluba film ka lir. Maneni film nung o tamajung, nüktapangta shilemtem aser ‘audio pornography’ dena lir, anungji iba ajanga film nem tetuyuba nung aliba ama certificate magütsü,” ta parnoki metetdaktsü.
Iba film ya Alankrita Shrivastava-i direct asü. Film otsü yagi lokti nung shilem balala nungi tetsür 4 parnok taküm nung nüjiso bushiba, aser tejangraba ataloktsü jangraba indang jembir. Film nung Konkona Sen Sharma, Ratna Pathak, Aahana Kumra aser Plabita Borthakur nungertemi tongti shilem agir, aser maneni Sushant Singh, Vikrant Massey, Shashank Arora, Vaibbhav Tatwawdi aser Jagat Singh Solanki nungertema film nung shilem balala agir.
Iba film film festival balala nung asadangogo aser Tokyo International Film Festival nung ‘Spirit of Asia Award angu’ aser Mumbai Film Festival nunga Best Film on Gender Equality shilem nung ‘Oxfam Award’ nguogo.