Kabul: American University amak; 10 shi tepset

Kabul, August 25 (Agencies): Mejangjatetba tongpang nung amshitsü prangpong abener telok kati Afghanistan yimtiba, Kabul nung tentetba American University of Afghanistan (AUA) amakba osang ka Afghanistan police-i tanü, Brehostibar nü metetdaktsüogo.
Tan AUA amaker teloki yasüng 6:30 ako nungi tenzüka AUA amaktsü tenzük aser Afghanistan police ketdangsertemi parnok den ghonda 10 shi tongpang raraba sülen tan amaker ajunga tepsetba osang jangjaogo.
“AUA nung atalokba lendong nung kaketshir nisung 7, police ketdanger 2 aser security guard 1 densema, ajak agi nisung 10 tashi asüba osang tang tashi nung jangjaogo,” ta Afghanistan Interior Ministry otongdar, Sediq Sediqqi-i osang jangjashitsü.
Paisa ashiba agi, bendanger tesayur 1 densema, tan lendong nung nisung 37 dak tema yiruba osanga jangjaogo.
Police ketdangsertemi AUA nung mapa inyaker aser kaketshirtem densema, nisung 700 dak tema taküm kümzükba osanga Sediqqi-i metetdaktsü.
“Tan lendong atalokdaktsür anema rarabaren nung ozü US mitkartemia shilem agia liasü,” ta US kübok Pentagon-ia metetdaktsüogo.
Ajisüaka, tan lendong atalokdaktsüba atema telok shingaia tang tashi nung lendong atalokdaktsüba atema tenüng agia metetdakja mali.
Tan August ita tetenzüklena mejangjatetba nisung kari AUA nung inyaker America nunger professor 1 aser Australia nunger tesayur 1 tashiyim agi pua anir aoba osang jangjaogo.
Tesayur 2 tashiyim agi apuba atema telok shingaia tenüng agia metetdakja mali aser tesayur anaji tang  kong lir iba osanga mebushiteti lir.
Tan lendong ajuruba university ya US nungi teyari agia yangluba sülen iba university 2006 küm lapoka liasü.