Kabul bomb lendong nung 95 asü, 158 yiru

Kabul, Jan 27 (Agencies) : Tanü Honibarnü Kabul yimti nung nisung kanga dang lungsoa alidak ambulance ka nung yuja aliba bomb tesashi ka pokloktsü aser iba tashiyim lendong nung nisung 95 taküm samaogo, ta official osang ka ajanga metetdaktsü.
Tanü bomb lendongji tawa küm ishika tsüngda atalokba tashiyim maparen tulutiba rongnung ka asütsü ta angazüker; iba lendong nung nisung 158 yirur lir.
Iba tashiyim maparenji parnok inyak, ta Taliban telungpurtemi nangzükogo aser tan hopta ka tsüngda Afghanistan yimtiba nung tan agi tanabenbuba parnoki iba tashiyim mapa inyaker.
Bomb lendong atalokli iba tesemji kanga dang tesüngmangtsüka liasü; tesem-tesem nung temang shilem kar, ano külen nisung jenti azü agi yimbanger merepshia liasü aser yirur alirtemji mozüki balalai bener adenshi.
Tawa Kabul nung ISIS telok aser telungpurtem naprongi asentenshir yamala tashiyim maparen sashia inyaker; iba yongjiang Afghanistan yimtiba ya nüburtem atema kanga dang tetsübutsü aliba tesem ka mesüka kümdar ta angazüker.
Jamuriate hospital nung tasümang aser yirur alirtem aika anir adenshiba nguogo, ta AFP osangbener kati ashi. Iba mozüki ya bomb lendong atalokba anasa lir aser idakji tebur dang masü tetsür aser tila tanurtema aika azü agi yimbanger atem nung nangdena liasü.
AFP osang den jembidang Health ministry nungi otongdar, Waheed Majroh-i ashiba agi, tang tashi nung asü-ama ajurtemji 95 aser yirur alirtemji 158 lir saka ano teimba akümtsü ta bilemdar.
European Union densema tongtibang office aika iba tesem anasaji lir saka Kabul yimti nung aruagi aliba EU delegation purtembo ajak kümzüka lir ta angazüker.
Iba bomb lendongji kanga dang tesashi liasü kechiaser bomb apokba tsüngken olaji kilometer 2 shi pilar aliba tesem tashi tonga oagi angashi; bomb apokdangji ki aika nung kichiba kanga sashia atashi.
Taküm bendanga agütsür ambulance gari nung bomb enoka bener aosang jagi shiranger ka Jamuriate mozükidangi bener aor ta shia mezüngbuba checkpoint adena ao saka tanabuba check gate nung paji shibar jangjatet nungji pai gari nung bena aliba bombji pokloktsü, ta AFP osang den jembidang interior ministry nung otongdar, Nasrat Rahimi-i metetdaktsü.
Bendangertemi mapang shia semdangba tesemtem talisa supermarket, dokang aser hotel amala nung ISIS purtemi tashhiyim maparen inyaktsü ako, ta tanep Honibar anepdang tekümdangtsü osang ka metetdaktsür liasü.