Kabul diplomatic zone nung bomb apok, 80 pokset

Kabul, May 31, 2017: Bothbarnü Kabul, Afghanistan nung bomb tesashi ka apokba sülen nisun kati yirua alir ka mozükidangi anir aoba noksa nung angur. Tanep Afghan yimtiba, Kabul yimti tiyong nung sewage tanker ka nung miima toktsüba bomb poka liasü, aser iba lendong nung tajemba agi nisung 80 süogo. 

Kabul, May 31 (Agencies): Tanep Afghanistan yimtiba, Kabul nung aliba diplomatic zone nung gari nung bomb pokdaktsüba ajanga nisung tajemba agi 80 pokset aser 350 yiruogo.
Mitkartemi kanga sashia nüka aliba tesem, Zanbaq Square anasa iba bomb apokdang civilian timba asü.
Anepdang nisung longsoa aliba mapang ka nung iba bomb apokba agi ali tuluka pokdok aser metre noklang aika orr aliba kishi aser kichiba ajunga raksatsü.
Iba lendong agütsüba ya Taliban telokia tenüng magi aser Islamic State nungia kecha shia mali. Saka iba telok anaprongi tawa linük nung lendong aika agüja arur.
Iba lendong nung BBC indang gari küm pezü dak tali anishir, Mohammed Nazir-a pokset, aser agency nung mapa inyaker pezü yiru, ta BBC ajanga ashi.
Iba bomb ya local time 08:25 meta apok ta ashir. Iba tesem nungi ambulance ajanga yirur alirtem mozüki balalai anir ao.
Iba lendong nung gari 50 dak tali raksatsü.
Iba bomb ya German Embassy anasa apok saka iba lendong agütsüba nükjidong ya meshiteter, ta Kabul police odongdar, Basir Mujahid-i osangbener dang ashi. Iba tesem nung tongtibang ki aika lir, item rongnung tir indang ki aser British indang embassy densema embassy aika lir.
Osang kar ajanga ashiba agi, iba bomb ya truck mesüra tzü abenba gari nung liasü. Osang kar ajanga ashiba agi iba bomb ya seret 1,500 liasü.
Iba lendong nung yirur alir nem azü tenlatsü asoshi sorkar ketdangsertemi nüburtem dang ajungshir. Iba tesem anasa alir kari ashiba agi, iba bomb apokba ajanga monoknok tesashi anoker amai liasü aser ki ajunga anokshitsü.