Kabul-i Pakistan nung aliba Taliban nokdangtsü ashir

Islamabad, February 21 (Agencies) : Pakistan Army-i Afghanistan diplomat tem jaoka Afghanistan nung telungpur jenoka yur Pakistan amakba nokdangtsü tetuyuba agütsür anogo ananü buba nung Kabul-ia Afghanistan nung aliba Taliban telungpur tenüng kar den Pakistan nung amenoka aliba telungpur training agiba tesem 32 zülua agütsüogo.
Hombarnü Afghanistan Foreign Ministry sangdong ka ajanga ashiba agi, parnoki agütsüba tenüngtemji Kabul nungi Pakistan diplomat, Omar Zakhiwal ajanga Pakistan ketdangsertem nem agütsü aser linük nung aliba telungpur nokdangtsü ashi.
Kasa sangdong ajanga ashiba agi, “Afghanistan Foreign Ministry-i telungpur tenüng tarensena züludenba shidi ka den Afghanistan nung lendong agütsütsü asoshi Pakistan nung amenoka aliba kiralongrartem training agiba tesem 32 zülur agütsü. Parnoki item anema tangsa tang teinyaktsü inyakang ta shiogo,”
Tang amai lendong maneni atalok nungbo Kabul-i kiralongrartem aser parnok pusemertem anema international tenokdangba meshitsü, ta sangdong nungji shia lir.
Ano Hombarnü tatalokba ka nung Zakhiwal-i, ni Pakistan Foreign Affairs Adviser Sartaj Aziz den kanga nüngdaka aliba senden ka menogo, ta metetdaktsü.
Zakhiwal-i, ni Pakistan Army chief General Qamar Bajwa dena ajak ajungtsü olen kar lemsatepogo aser kidanger linük ana tsüngda tebilemtsü memunui süngjema akümtsü, ta shisem.
Telungpur tenüng züludenba shidiji Afghanistan diplomat-i Bajwa nem agütsü aser Zakhiwal den ajurutepba mapang tesem nung security aser arrtsü atema sensak asem, ta Aziz-i osangbenertem dang ashi.
Pakistan sepaitemi Afghanistan arrtsülen alibaa telungpurtem amaktsü inyakyim tenzüka telungpur aika tepseta parnok atsükoka aliba tesep jenti raksatsüba sülen Kabul-i iba takangba agütsü, ta osangbenertemi ashi.
Hombarnü Bajwa-i, Pakistan aser Afghanistan na senteper kiralongraba anema raratsü, ta shia liasü.
Pakistan-i tang ya linük arrtsülen sepai tali yoksema nükdaktsüdar.