Kabul nung ISIL temi lendong agütsü, nisung aika asü

Kabul, August 25 (Agencies): Shia Muslim tem Hokulbarnü sarasademtsü asoshi Afghan yimtiba nung aliba tekülem ki ka nung adenshia alidang suicide bomb pokloktsüba sülen prangbong agi khatepba mapang nisung 20 asü aser aika yiru aser iba lendong ya ISIL teloki agütsü, ta tenüng agiogo.
North Kabul nung Qala-Najara anasa Imam Zaman mosque nung bomb apokba sülen prangbong amertem tekülem ki telungi aita injang khaloktsü tenzük.
“Onok iba tekülem ki nung sarasatem tenzüktsü atatepa lia pei sasa taküm bendanga agütsür lendong agütsürtem arua tekülem ki anükertem khaset aser tekülem ki telungi ait,” ta tenük kuli alir, Ghulam Reza-i osangbener dang ashi.
Iba lendong nung nisung 20 dak tali süogo aser tajemba agi nisung 40 yirur mozüki nung anepaluba mapang lir, aser item yirur alirtem ya kar bo mekümzüktettsü südi, ta ketdangsertemi ashir.
Police temi tekülem ki telungi aitsü merang saka lendong agütsürtemi bomb pokdaktsüba ajanga telungi meitet, ta police ketdangser Mohammad Sadiq Muradi-i ashi.
Iba tekülem ki nung nisung 1,000 asemer, ta Afghanistan indanga Shia clerical council nung züngsem, Mir Hussain Nasiri-i ashi.
Iba tekülem ki dakdang tuluba ya tesangwa peria mali aser tesadem lir. Tanabuba floor nung tetsürtem sarasademer. Tekülem ki telungi police tem aitsü merang dang tanabuba floor-i atutsü aliba kishi ya lendong agütsürtemi nembanga ayu aser tetsürtem ya hostage ama ayu, ta Nasiri-i ashi.
Lendong agütsürtem indang injang tembangba sülen kotari agi tekülemer dak atsüng tenzük aser iba mapang tanur aser tetsür densema nisung aika asü, ta osangbenertem dang tenük kuli alirtemi ashi.
Islamic State of Iraq & Levant telok Afghanistan nung alirtemi iba lendong agütsüba tenüng agiogo. ISIL den sendaktepa aliba Aamaq website ajanga ashiba agi, Hokulbar nü par telok indang rarar anati lendong ya agütsü. Saka iba dak alaka kicha shia meliasü.