Kabul nung Taliban teloki amak; 14 asü, 145 yiru

Kabul, Luroi/Aug. 07, 2019 : Afghanistan yimtiba Kabul nung August 07, 2019 anogo bomb apokba tesem Afghan security force temi semdangba noksa nung angur. Afghan yimtiba anüdoklen tsütsü mazüngi aliba tesem nung Bodhbarnü bomb tesashi poklokja nisung 14 taküm sama aser 145 yiru, ta sorkar ketdangsertemi ashi.

Kabul, Luroi/August 07 (Agencies): Bodhbarnü Afghanistan yimtiba, Kabul nung taküm bendanga agütsür gari nung bomb inoka bener arua police station ka nung pokloktsüba lendong ya Taliban teloki tenüng agiogo, kong nisung 14 taküm sama aser 145 yiru, ta sorkari ashi.
Taliban aser United States na tsüngta ken o jembiba tatemleni arur ama yimya agi sayuaka Afghanistan nung azüdokshi ajema makümer. US aser Taliban telok tsüngta ken o jembiba nung US sepaitem iba linük nungi anizüker aotsü aser iba melen Taliban teloki linük nung azüdokshi anentsü.
Yimti anüolen iba lendong ya anepdang nüburtem kanga mazüngi aliba mapang atalok aser iba tesem nungi mokozü tanak anüngleni atuba meta talang nungia nguogo.
Recruitment centre ka ozü suicide bomber temi amak, ta Taliban-i ashi.
“Iba lendong nung sepai aser police aika tepset mesüra yiru,” ta Taliban teloki sangdongba ka nung ashi.
Deputy Interior Minister Khoshal Sadat-i osangbener senden ka nung jembiba mapang, iba lendong nung nisung 14 asü aser 145 yiru, ta metetdaktsü. Asürtem pezü police liasü aser tanüngba ajak civilian tem lir, aser yirur alir parnok 92 civilian lir, ta pai ashi.
Bomb bena aliba gari ya police station kima checkpoint ka nung anendaktsüdang apok, ta interior ministry odongtar Nasrat Rahimi-i metetdaktsü.
Asürtem rongnung tetsür aser tanur dena lir, ta health ministry ajanga ashi.
Iba tesem nung tangokba noksatem nung ki kar kanga mejungi poksar aliba aser tesem ajungalen ki teraksa aser gari teraksa aliba nguogo.
“Ano maneni Kabul nung civilian aliba tesem ka nung tenük yoker Taliban teloki lendong agütsüba nung tai maket nisung aika yirutsü,” ta Tir Ashraf Ghani indang odongtar Sediq Sediqqi-i Twitter nung zülutsü.
“Taliban teloki maneni lendong agütsüba ajanga parnok yimjung asoshi bendanga agütsür inyakba mesayur,” ta Sediqqi-i osangbener senden ka nung ashi.
September 28 nü tir election magidaktsütsü Taliban teloki sangdonger anogo ka lir iba lendong ya atalok, kong parnoki election nübuyim nung lendong agütsütsü amokmerena liasü.
Maneni Mongulbar aonung security forces temi Kabul nung Islamic State telungpurtem atsükoka aliba tesem ana amakdang telungpur ana tepset aser tapoktsü oset aser bomb yangluba hadir aika ngutet, ta National Directorate of Security (NDS) ajanga ashi.
Iba mapang security forces nungia züngsem asem asü, ta iba agency odongtari ashi.
Taliban den yimjung ken o anir jembir US peace envoy aser Taliban telok nungi ketdangsertemi America nunger asoshi rara talangtiba tembangtsü nükjidong nung Qatar nung jembishinüba nung terenlok lir, ta sangdonga lir.
Taliban telok ya 2001 küm United States-i atsüngdok, saka parnoki Afghanistan linük tuluba amokbanga lir aser US sepaitemi linük yutsür mora Taliban den raraba metembangtsü, ta sorkar ketdangsertemi tsübua bilemer.
US-i anir NATO sepaitem Afghan sepaitem nem training aser teyari agütsütsü asoshi bendanger sepai 20,000 shi Afghanistan nung aliba rongnung America nunger timba lir. US sepai karibo kiralongrar anema rarar.
US Tir Donald Trump-ia Afghan nung rara tembangtsü pa indang nükjidong aliba sangdonga lir.