Kabul yimti nung bomb lendong atalok; 15 pokset, 400 shi yiru

Afghanistan kübok Kabul yimti nung bomb alenokba truck gari ka tanep anepongi pokdakja lendong atalokdaktsüba sülen Afghan police ketdangser kati lendong atalokdak poksar aliba car gari ka anasa bushisüngdangba noksa nung angur. (Kabul, August 07)

 Kabul, August 07 (Agencies): Afghanistan yimtiba, Kabul yimti tiyongtsülen truck gari nung alenokba bomb tesashi ka tanü Hokolbar nü pokdakja lendong kanga sashia atalokdaktsüogo ta police-i metetdaktsü.

Shah Shaheed kiyong nung tanep anepongi bomb pokdaktsüba ajanga nisung 15 poksetba aser nisung 400 shi yiruba osang tang tashi nung jangjaogo ta Kabul police lenisang, Abdul Rahman Rahimi-i osang jangjashitsü.

“Tanü lendong nung tila tanur aser tetsürtem densema lendong atalokdak anasa tentetba marble lung company nung mapa inyakertem asüba aser yiruba osang tang tashi nung jangjaogo. Tan lendong nung asür osangji tang jangjaba den timba akümtsü akok,” ta Health Ministry otongdar, Wahidullha Mayar-ia metetdaktsü.

Afghanistan-i Taliban densema telungpur aser kiralongrartem den tongpang raraba ajanga tai maketba tila tanur aser tetsürtem jenti asütsü tenzükba osang ka United Nations (UN)-i yashi sangoktsüba sülen tan lendong ya ataloker lir.

Tan lendong atalokdaktsüba asoshi telok shingaia tang tashi nung tenüng agia metetdakja mali saka Taliban teloki tan amala lendong balala Afghanistan nung mapang shia atalokdaktsüba yong tanü lendongjia par telok mapasa asütsü akok ta temulung malemba olen ka deputy presidential otongdar, Sayed Zafar Hashemi-ia metetdaktsüogo.