Kader Khan nem akhümtsübu tagütsütsü tim magütsür: K.C. Bokadia

Aenjeti/January 3, 2019 (Agencies): Film yanglur K. C. Bokadia shibai Kader Khan den film aika nung shilem agiogo, pai ashiba agi, asür Kader Khan nem film industry-i akhüm tsübu agütsütsü tim magütsü.
“Asenok industry nung nüburtemi sempet tajung aketba purtem amadaoker. Kader Khan ama pa acting asüba nungi anenba sülenbo nüburtemi pa amadok. Taoba küm pongu tsüngda pa temang nung timtem balala agi kangshia aruogo. Iba mapang nung ni par kidangi oa ajurutepa liasü,” ta Bokadia-i ashi.
“Pai actor aika anitetogo aser film nung shilem agiba mapang pai parnok tsübua melei shilem agidaktsüogo. Pa dak alang film industry-i pa nem akhüm tsübu magütsü. Industry nung inyakertemi nisung ka kanga takok ngua aoba mapang tushia amshir aser iba sülenbo shinga sükshia mali. Iba ya kanga dang tiamaka inyakyim ka ama bilemer aser iba amala ya matalokdaktsütsüla,” ta pai ashi.
“Film nung inyakba mapang ajak artificial kümogo aser shingaia tangar atema mebilemer. Asenoki asenok ya kibong tuluka ta mapang aben tetshir saka asangsangnungbo takok anguba ajanga dang na meketa nüburtem sendener. Pa nem industry-i akhüm tsübu agütsütsü talang ta nibo bilemer. Pa asüba sülen akhümtsübu tangutsü tim angutsü imlar,” ta Bokadia-i maneni shisem.
Bokadia aser Kader Khan na “Deewana Main Deewana”, “Dil Hai Betaab”, “Tyagi”, “Maidan-E-Jung”, “Kab Tak Chup Rahungi”, “Ganga Tere Desh Mein” film tem nung külemi shilem agiogo.
Kader Khan bilemteta jembiba mapang Bokadia-i ashiba agi, “pa kanga nisung tajung ka liasü. Tang tashi nung ni film 55 yanglua lir aser item rongnung pai film 15 nungi 20 tsüngda shilem agir alitsü südi. Pa ya director-i tuyuba sülen anidakba actor ka liasü aser pa amala actor tanü asenok rongnung mali ama bilemer.”