KADTA-i Diphu police dang KATOWA züngsem kar aputsü ashi

Dimapur, May 27 (TYO): Karbi Anglong Truck Owners Welfare Association (KATOWA) züngsem kari National Highway-36 nung truck garitem dang ozüng alema sen saruba atema Karbi Anglong Dimapur Transporters Association (KADTA)-i Diphu police dang item nisungtem aputsü takhangba ka agütsüogo, ta KADTA Tir Anil Toppo-i sangdong ka ajanga metetdaktsü.
KADTA-i KATOWA dang anogo ananü tsüngda nung parnok nem sen sarutsü temelaba shirnoki agütsüar iba shidiji sayuang ta takhangba ka angutsüogo aser parnoki züngzüktsüba mapang nung iba kuli mesayutetra National Highway 36 nung ozüng alema sen saruba inyakyim ajak parnok nem tongloktsütsü, ta sangdong ajanga ashi.
Augustine Kramasa-i aniba KATOWA teloki May 20, 2016 nü gari tetsüng 10 aliba truck ka (NL07A-6571) pua ayu. Iba dak sentakba nung Dillai Police Station nung FIR ka benoka lir, ta KADTA-i Diphu Police dang ashi.
KATOWA ta ajaba telok yagi Lahorijan nung truck ajak dang “Entry Fee” sen noklang kaka (Rs.100 each) meshia arur anungji iba tim masüba mapa ya anendaktsütsüla, ta KADTA-i Diphu police dang metetdaktsü. KATOWA-i meshiba ama sen 100 ji magütsüba ajanga truck, NL07A-6571 jia pua ayuba lir.
Anil Toppo-i Karbi Anglong District Deputy Commissioner, SP aser CEM nunger dang item aibelenertem dak ozüngi meleba ama temerenshi agüjang ta temipishiba ka agütsüogo.
KADTA-i, Bokajan Truck Owners’ Association, Sand Suppliers of Dimapur, Truck Drivers Union, Truck Owners Union aser Dimapur nung transporter union tem danga Lahorijan nung ozüng alema sen sarurtem nokdangba nung teka amteper nokdakdi, ta temepishiba ka agütsüogo.