Kahaani 2 film nung Vidya Balan ozüng alema inyaker ka adoker

New Delhi, October 18, 2016 : Vidya Balan aser Arjun Rampal nati tongti shilem agiba film, Kahaani 2 indang video tatsüka sayaogo. Iba video nungji Vidya Balan-i ozüng alema inyakba ajanga ozüngi bushir ‘Wanted’ tetsür arishi küm 36 tain Durga Rani Singh ama shilem agia lir. Lai tangar pua yur sen akhangba aser nisung tepsetba atema police-i la bushiba iba video nungji angur.
Gauri Shinde-i direction asüba film ‘Dear Zindagi’ November 25, 2016 nü sayatsü anungji iba kasa anogo nung producers Jayantilal Gada aser Mahesh Bhatt nati iba film ana khenüyongi mesayatsü ta tawa ang metetdaktsüogo.
“Bhatt Sahab (Mahesh Bhatt) ya onok indang TV ssentong ‘Udann’ aser ‘Naamkarann’ den sendaktepa lir aser ibaji dang masü saka Alia tena onok den kibong ka amai lir. Onok tsüngda kodanga kecha metokteper, anungji ni ‘Kahaani 2- Durga Rani Singh’ film ya December 2, 2016 nü sayatsü lemtetogo,” ta New Delhi nung Gada-i sangdong ka ajanga metetdaktsü.
“Ni Jayantilal Gada meteter küm aika ajunger aser onok ya kibong ka amai lir. ‘Kahaani 2’ aser ‘Dear Zindagi’ naprong ya film balala lir anungji anogo balala nung sayatsü tetemsü aser ibaji ajanga tarutsü nung kanga ajangzüktsü,” ta Mahesh Batt-i ashi.
Dear Zindagi film bo social media ajanga terabo metetjemogo ajisüaka Kahaani 2 bo aikati memetet. Alia Bhatt aser Shah Rukh Khan naprongi Instagram aser Twitter ajanga parnok sapurtem nem film osang agüja aruogo.
Kahaani 2 film ya Sujoy Ghosh-i direct asü aser tangar ka tena repa produce asüba lir.
Kahaani film nung Vidya-i kinungbo samar la temang mazüngi aliba tetsür ka shilem kanga junga agitetba ajanga la Bollywood actress temaba jenjangi tongteter rongnung züngshir.