Kaito Aye-i ‘NagaFarmDoctor’ mobile app sayatsü

Dimapur, Rongchii (April) 17 (TYO): Agriculture department-i Rongchii (April) 17, 2018 nü Agriculture & Cooperation Minister, G. Kaito Aye pelaa agizükba sentong ka ayongzüka agi.
Sentong nung Kaito Aye-i o jembidang, sorkar ketdangsertemi state nung teküpokba jenjang nung alirtem yaritsü atema yimtsüngtemi aotsü ayongzük.
Temelenshi bener arutsüla anungji asenok ajak longjemer mapa inyaktsüla aser aluyimertem nem tajangzük agütsütsüla, ta paisa ashi.
Department-i tenzükba schemes aser programmes shitak inyaktsüla aser asenoki compact farming ajungmesotsüla. Iba ajanga ali tila aliba auyimertem ajangzüktsü aser state-ia teyari angutsü. Tsünüsenbongtsü aika adokba tesem kar nungbo Cold storage yanglutsüla aser department indang teinyaktsü tongtipangbaji state indang rongsenkettsüng ajungkettsü atema aluyimertem kümzüktsü atema asütsüla, ta Kaito-isa shisem.
Tanü sentong nung Minister Kaito-isa ‘NagaFarmDoctor’ ta ser android phone atema mobile app ka sayatsü.
Iba app nung telemsa ana lir, kaji interactive feature koba ajanga aluyimertemi tasüngdangba asüngdangtsü akok aser feature kaji tsünüsenbongtsü dak adokba tashidak aser aratem indang osang metettsü.
‘NagaFarmDoctor’ app ya WhatsApp mesüka lir aser chain communication feature dena lir.
Sentong nung Agriculture Additional Director, Henry Zeliang-i tesentepertem pela agizükdang, Minister Kaito Aye-i Nagaland nung department tejentiba rongnung ka ketdangsütsü shimba atema pelaba metetdaktsü.
Agriculture Director, G. Ikuto Zhimomi-ia slide presentation ka ajanga tang department-i inyakba mapatem indang osang metetdaktsü.
Agriculture Department-i anogo 100 (Metsüremi 8 nungi Aami 18, 2018) tsüngda mapa inyaktsü sentongtem atongba indang osang G. Ikuto-isa lemsatep. Tatem nung Agriculture Additional Director, Butang Khaim-i anküp tepela o jembi.