Kaka football asaya nungi anener

Sao Paulo, December 18 (Agencies): Taoba AC Milan aser Real Madrid midfielder Kaka-i Deobarnü football asaya nungi retire asüba sangdongogo.
Arishi küm 35 tain Brazil nunger asayar yagi Twitter nung yamai zülutsü: “Ni bilemba dang nungi tali jangratema asayaogo. Kanga dang pelar! Ni taküm nung taruba jenjang atema renema lir. Yisu tenüng nung. Amen.”
Kaka-i taküm pa Orlando City den contract meyanglushitsü, ta sangdonga liasü saka Milani-i meyiba aotsüba atema lenmangbo sadema lapoka toktsü. Iba club nung asaya tenzükba sülen pa ajaki meteta kanga nüngtugu aküm.
“Ni club nung manager mesera sporting director mesera club nung tanga mapa kar nung shilem aginer,” ta pai Brazil nung Globo TV den farewell interview nung ashi.
“Ni professional footballer ka akümtsüba atema kanga mreranga renem aser ni iba jenjang tasen ka atema renemner,” ta paisa ashi.
Paisa ashiba agi, Milan koba club den pai 2007 küm Champions League akok, parnoki pa nem mapa ka agütsüogo, saka pia kechi mapar ajibo tejangja mashi mesera iba mapa pai agizüktsü asü magizüktsüar kecha mashi.
Milan aser pa mezüngbuba asayaba club Sao Paulo puri pa nem ano maneni asayatsü asoshi maongka agütsü, saka pai ashiba agi, pa joko asaya nungi anentsü asoshi mapang tongogo. Kaka ya Brazil nungeri 2002 world cup akokba squad nung densema liasü aser pai 2007 küm world player of the year dena nguogo.