Kaket tasen ka saya, Shiba aitsütsü ?

Dimapur, Nov. 27 (TYO) : Wabong Maong Jamiri züluba kaket ka tenüng agi ” Shiba aitsütsü ?” ta asüba kaket ka Hombar anepdang Dimapur Ao Baptist Arogo nung sannüker Rev.Dr.N.Tzüdiri DABA Elim hall nung sarasademer sayatsüogo.
Iba kaket zülur tenüngsanga jembidang, kaket züluri pa anogo shi inyakba mapatem nungi ano awaloka oa timtem jenti agia kaket züluba mapa yagi asenok ajak ajungshidaktsüdi ta Rev.Dr.N.Tzüdiri metetdaktsü. Iba kaket azüngba ajanga nisung ajak temoatsü aser tajangzük angutsü imlar ta paisa shisem.
” Küm 13 buba Prodigals’ Home nung Tsüngremer tenyaba wadang nung inyakdang ajangshia aruba tesüngmangtsü aser mamangtettsüsa otsü aika lir aser itemji nübortem den lemsatepdang aikati item otsütemji kaket küma zülutsü ajungshiba agi tanü iba kaket zülutetogo,” ta kaker zülur Wb.Maong Jamiri metetdaktsü.
Iba kaket nung kibong nung tsüraburtem junga melitetba ajanga tanurtem taküm raksadaktsüba aser kiburi kilirtem meima mamshiba ajanga timtem ajuruba otsütem temulung raksatsüka shia lir. ” Iba kaket azüngdang kar temoatsü angutsü aser ano karbo yirutsüa akok, saka tajangzük ngudaktsütsü asoshi sarasadema züluogo,” ta kaketzülurisa paisa ashi.
Iba kaket sayaba sentong ya Wt.Renemsongla Ozükümi ketdangsüa liasü.
Wb.Maong Jamir ya Unger nunger lir. Pa ya BD zünger 2004 küm nungi peisasa pei taküm mazüokteti raksaba lanurtem taküm yanglushidak Prodigals’ Home, Dimapur nung Assistant Director inyaker.
“Shiba Aitsütsü ?” kaket jenjang ya sen Rs.150 lir aser ABAM Book Store, Impur, Mokokchung; Word of Christ, Dimapur; Christian Literature Center, Dimapur; Hallelujah Book Centre, Nagarjan Junction, Dimapur aser ABAM Book Depot, Mokokchung nung angutsü. Ano, kaket zülur den mobile number 9436604164 ajanga tongteprateptsü akok.