Kaket zülur 200-i tesempa anema vote agütsütsü ayongzüker

New Delhi, April 2 (Agencies): Lok Sabha election agitsü mapang ana nung lia India linük nung kaket ken o zülur nisung 200 dak temai India nunger dang tesempa politics anema vote agütsütsü ayongzükogo.
Indian Cultural Forum nung adokba shidi nung Girish Karnad, Arundhati Roy, Amitav Ghosh, Nayantara Sahgal aser Romila Thapar nunger densema kaket zülur 200 dak temai, linük nung telemsa adokdaktsütsü aser tetsübu lidaktsütsü atema tesempa politics amshir, aser nisung aikati senso ka temedentem mangur, ta ashi.
“Kaket zülurtem, artist tem, film yanglurtem, kentenertem aser sobaliba nung mongintem amokmerener. Sorkar tashi nung alirtem dang shibai ashishia jembidir paji amokmerener mesüra tai tonglokja apur. Onok ajaki iba ya melenshidaktsüner. Mezüngbuba meraji asenoki kobi melii agitettsü, aser iba atemaji tesempa politics anema vote agütsütsüla. Ibayongji onoki sensotem dang India nunger senso balala ajak tebendang makai litettsüsa sensotem dang vote agüjang ta mepishir,” ta shidi nung shia lir.
Parnokisa sensotem dang, linük temzüng nung tenangzükbatem benshitettsü atema vote agütsütsüla, ta ashi.
“Linük temzüng ajanga senso ajak nem kasa temeden agütsür, peii melungba achitsü, sarasademtsü aser libalirotsü atema temeden agütsür aser melung masüba atema ola adoktsü asoshi temeden agütsür. Ajisüaka tesüiba küm ishika tsüngda asenoki linük nung sensotem loktii tepsetba mesüra azükba aser pei tamangba yimsü, kin aser tesem nung ajemdaker mezüngmeshiba ajangshiogo,” ta shidi nung shia lir.
Parnokisa tetsürtem, dalits, adivasis aser minority tem anema inyakba mapatem anema inyaktsü takhangba agütsü.
Iba shidi ya English, Hindi aser Marathi, Gujarati, Urdu, Bangla, Malayalam, Tamil, Kannada den Telugu densema oshi aika nung adokogo.