Kaketrejutem yimten sabang akümer:Bengal Angh

Kolkata, February 24 (Agencies) : JNU aser Jadavpur University na nung longkak aitba indang jembidang West Bengal Angh K.N.Tripathi-i, kaketrejutem yimten sabang küma odar, ta ashi.
Sentong ka nung adenba mapang, pai, ‘freedom of speech & expression’ ya tim masüba tsütsü amshia yimten yimsürsür sentsü nung institution inyakyim amoshitsü meranger, ta ashi.
“Higher education institution tem ajak yimten sabang küma odar. Putu aika tim masü policy benshia aruba anentsüla. Kaketrejutem inyakyim nung yimten teka aitba ngua arur. Item tatalokba ya lokti tentet balala tentettsü temeten sadema lapokja aliba aser freedom of speech & expression tim masüba tsütsü amshiba ajanga lir,” ta state nung kaketrejutem nung ex-officio chancellor, Tripathi-i ashi.
“Kaketreju tesem ka dakji tashi aser temeten balaka lir ajisüaka item temetenji tim masüba tsütsü mamshitsüla,” ta JNU kaketshir lenir Kanhaiya Kumar pua aliba mapang ka nung Angh-i ashi.
Iba tatalokba nung sorkar inyakyim anema longkak aitba mapang Jadavpur University nung kaketshir kari parliament amaktsü merangsang, Afzal Guru pusema yimyim ayimba den Jammu & Kashmir, Manipur aser Nagaland state tem nem nüjiso agüjang ta ola agütsü.
Tripathi-i jembiba o tem educationists temi aitsüogo.
“Pai Angh aser chancellor ka ama masü saka yimten yimsüsür ka ama jembiogo. Kaketshirtem dang yimten tebilemtsü nungi pila liang ta ashibaji tanur o jembir mesüka lir. Tang aliba yimten yimsüsürtem timba ka student politics ajanga iba jenjang tongteta lir,” ta educationist Pabitra Sarkar-i ashi.