Kaketshir 55 nem CMMSF agütsüogo

Dimapur, January 31 (TYO): Tanü Capital Convention Centre, Kohima nung Nagaland Board of School Education (NBSE)-i Chief Minister’s Meritorious Students Fellowship Award agütsüba sentong ka ayonga agiogo.
HSLC tatidang agütsürtem rongnung tematiba jenjang takok angur kaketshir 55 nem tanü sempettem agüja liasü.
Tanü tetoktepba alima nung Naga kaketshirtem indaktsütsü aser ajungmesotsü atema Meritorious Students Fellowship agütsür, ta tanü Chief Minister Nephiu Rio-i o jembidang ashi.

“Takok anguba denji tebilemtsü dena lir aser kaketshirtemi shisaliokba maparen süoki ia merangtsü imlar. Nenoki maneni takok tajung ngua züngyonga aotsüla. Nenoki nenok kibong atema dang masü saka Naga loktiliba atema tagitsüpurtem akümtsü merangangma” ta Rio-i sempet angurtem dang ashi.

Iba sentong nung School Education Advisor, K.T Sukhalu-ia o tatsüka jembidang “Naga loktiliba nung lanurtemi shilem agitsü kanga nüngdaka kümogo aser state sorkari lanurtem ajungmesotsü atema inyakba nung iba sempet ya ka lir” ta ashi.

Nagaland nung aliba tsüraburtem dang tanur shisaliokba wadang asoshi temulung agütsütsü osang sangoktsütsü atema iba fellowship ya tentetba lir. School aser college nung degree ka anguba dang masü saka nisung ka yimyatsüya tajungba kümdaktsür, ta K.T Sukhalu-isa metetdaktsü.

Iba sentong nung School Education & SCERT Principal Secretary Menukhol John-i tesentepertem pela agizük, Northfield School, Kohima nungi Rouvilhou Kense-i ken ka aten aser sempet angurtem tenüng nungi G.Rio School, Kohima nungi Niephreno Iralu aser Mezhür Hr. Sec. School, Kohima nung Emjungwapang Amer nati o jembi.

Chief Minister’s Meritorious Students Fellowship (CMMSF) ya October 14, 2019 nü tentet.

–    Iba Fellowship ya NBSE-i ketdangsüa agiba HSLC tatidang nung tematiba jenjang angur kaketshir 50 nem agütsür.

–    Shimtetba kaketshir 50 ji Nagaland nung indigenous Schedule Tribe züngsem asütsüla.

–    Nisung ka dak talii jenjang kasa nung takok ngura, ajak nem CMMSF agütsütsü.

–    Senpetji Annual/yearly basis nung agütsütsü aser mezüng fellowship agütsüba küm, kulikaket ka den senpet agütsütsü.

–    CMMSF ya küm pungu atema agütsütsü aser iba sempet angur kaketshirtem indang annual academic performance teti reprangtsü.

Fellowship anguba kaketshirtemi maneni iba teyari angutsü atema promotion/annual/semester examination nung 80% dang teküpok mangutsüla. Ibaji metongtetra CMMSF agütsüba anentsü.