Kaketshir 8 nem N.I. Jamir Academic Excellence Award agütsü

Dimapur, July 15 (TYO): Kohima Ongpangkong Telongjem (KOT)-i ayongzüka Honibarnü 11 buba N.I. Jamir Academic Excellence Award sentong mera keta agiogo.
Sentongji Molu ki, Merhulietsa Kohima nung agi aser tongti o jembirji Commissioner of Taxes, Nagaland Asangba Chuba liasü.
N.I. Jamir Academic Excellence Award ya NBSE ajanga agiba HSLC tatidang nung temaba menden 20 nung densemba Aor kaketshirtem nem agütsür aser kaketshir shia nem sen 10000 senpet den kulikaket ka agütsür.
2017 asoshi N.I. Jamir Academic Excellence Award angurtemji kaketshir 8 lir aser parnokji Moamanen Jamir (10th Rank), Limatula Imchen (12th Rank), T. Sentolila Lemtor (13th Rank), Nokingsangla Jamir (14th Rank), Temjeninla Jamir (16th Rank), Zuiner Jamir (18th Rank), Longsener Longkumer (19th Rank) aser Okten Jamir (20th Rank).
Sentong nung tongti o jembir Asangba Chuba-i sempet agizükertem dang ‘iba ya tetushi tulu ka lir’ ta ashi.
Asenoki alizüng ka atongtsü atema merangtsüla aser kaketshirtemi ochishia azüngtsüla. Asenoki asen lima tensa tia indang metettsüla. Asenoki temelenshi nüngdaker aser ibaji atema asen loktiliba nung telemsa adoka aliba ya agientsüla, ta Asangba Chuba-isa kaketshirtem ayongzük.
Sentong nung Retd. Chief Secretary, Alemtemshi Jamir-ia o tatsüka jembidang, sempet angur ajak nem tenüngsang agütsü. “Asenok tetoktepba lima ka nung alir aser iba nung ajaki takok angutsü atema kanga meranga inyaktsüla” ta pai kaketshirtem dang ashi.
N.I. Jamir Trust Board züngsem C. Imtingzuk Longkumer-ia o jembidang, “asür N.I. Jamir ji Aor asoshi dang masü saka Naga nunger atem tebu ka ama lir. Tanü nenoki iba sempet agizüker saka iba ya ajanga nenok tarutsü lenmang lapoktsür” ta kaketshirtem dang ashi.
2017 tashi nung kaketshir 42-i N.I. Jamir Academic Excellence Award agizükogo.