Kaketshir ka noksa tangokdang tzüyim nung tsük

Mumbai, January 09 (Agencies): Honibarnü Mumbai nung college azünger aiür ka Arabian Sea rocky beach nung la meyong phone agi la sasa noksa tangokdang tzüyim nung lua tsük.
La aser la kümzüktsü atema tzüi pongoka aisang naprongla tang tashi nung ano mongui bushitepdar, ta police-i ashi.
Iba kaketshir ya ano küm 20 majung aser la tenüng Tarannum ta jangjaogo. La Bandra Bandstand nung aliba rocky beach nung noksa tangoktsü merangdang ajupeter tzü nung lua tsük.
La tzü nung tsükba ajanga lar medemtsür ana taoksa nung artenba angashia iba tesem nung alir, asangur, Rajesh Walunj, la kümzüktsü asoshi tzüi pongoka ai.
Tenaprong Honibar nikongdang tashi nung mongui bushitepa liasü.
Rajiv Gandhi Bandra Worli Sea Link anasa police, fire brigade aser Worli nung angopurtem adenshia tena bushiba maparen nung yaritepa liasü.
College azünger aiür asem ya Bainganwadi nungi lir aser hopta tatem chiyutepba amungtsü asoshi Bandra-i aruba liasü, ta police inspector tejen R. Dhavle-i osangbenertem dang ashi.
Dhavle-i, tzüküm nungi metre 50 shi pilar tzü nung tsükla, Tarannum aser Walunj na joko tsüküm nung talangka pila ponger oer alitsü, ta mulung melemi bilemer.