July, 30, 2016 : Policy Analyst & Development Consultant, Amba Jamir-i, kaketshir ka asüba mapangji asen taküm atema telemtetba agitsü mapang tajungtiba lir. Iba mapang ya nai angazükba aser meteta aliba tasatem teti benshiba ajanga item yimya nai azüokteta akümtsü, ta ashi.
Mangkolemba Sub-Division nung tan mezüngsua Student’s Union Mangkolemba aser SDPDB Mangkolemba na lokteper ayongba, taküm wadang tesayuba (carrer guidance) tsütsü shisatokten aser workshop sentong Mangkolemba, town hall nung akaba mapang Amba-i, kaketshir asüba mapang nung nisung shiai mapa balala nung renloka inyakyim ajak indang tasa renloktsü nüngdak, ta kaketshirtem ayongzük.
Pai, “Küm 20 sülen asenoki jangraba tongteta asen kümnüba akümtsü atema tang yongi asenoki nükjidong tajung yua meranga inyaktsüla. Nü nükjidong atongtsü atema nü sasa bendanga agüja inyaktsü nüngdak. Yamaji asüba ajanga taküm nung tetsüdaktsü ajuruba den raratettsüsa memeteti nai tangazükba jenti angutsü aser inyakyim ajak nung renloker alitsü,” ta ashi.
Item ajak mapa küma aotsü atema tamendakdakji kaket shisatsü lir, ta pai shisem.
Nisung kati alu balala nung inyakertem den metetpela-a angazüktsü nüngdak saka tangar nem nü wadang (career) melenshidaktsütsüsa malitsüla, ta paisa ashi.
Sentong tetenzüklen Tsurangkong Student’s Union, Tir Alem Jamir, Jangpetkong Student’s Union, Tir Merang Ozükum aser Japukong Student’s Union, Tir Rongsen Aier nungeri iba sentong ayongertem dang kanga pelaba lemsatepdang kaketshirtemi iba shisatokten ajanga taküm nung telemtetba tajung agitsü ajungshia liasü.
Government High School Changki, Yajang, Longchem, Khar, Alongkima, Dibuia, Tsurangkong, Mission School Changki, GHSS and BHSS MBA den passed sür aliba kaketshirtem aser Sub Division kübok aliba Student’s Union balala nungi kaketshir ajak agi 500 tashi iba shisatokten aser workshop nung shilem agiogo.
You must be logged in to post a comment Login