Kaketshir lenir 12 anema ken o aginogo

Aizwal, August 3 (Agencies): Kaketshit tentet balala ajanga longkak aitba sentong ayongzüka agiba sülen kaketshir lenir 12 anema ken o benoka aliba public prosecutor kati aginba sülen District okadak ka ajanga parnok chiokogo.
Parnok den külemi taoba mapang kaketshir lenir kar dena iba okadak ajanga chiok.
Public prosecutor R C Thanga-i parnok anema ken o benoka aliba aginba tezüluba nung agütsüba sülen Aizawl district court Magistrate, H Lalduhsanga-i parnok chiok.
Tang aser taoba mapang nung kaketshir lenirtem anema ken o tawa lapokshiba sülen parnok obendangtsü asoshi district okadaki jaoka liasü. Parnok ya taoba küm January ita iba mapang nung Commissioner for People with Disabilities alisang anema longkak aitba ken o nung aija liasü.
Commissioner B Sairengpuii ya retired sorkar ketdangser ka lir aser Chief Minister Lal Thanhawla kinungtsü Lal Riliani tenü lir. La mapa nung shimba anema Mizo Students’ Union aser Aizawl City College Joint Students’ Union nati longkak aitba sülen la mapa nungi anentsüsa aküm. Parnoki Congress sorkari tejak repranga inyaksangshir ta aitsü.
Iba dak sendakba nung 2016 April 21 nü police aser kaketshitem tsüngda kanga mejungi mangatettep adoka liasü.
Mizoram Blind Society dena mada mabensar lokti balala-ia Sairengpuii mapa nung shimokba anema longkak aita liasü. Parnoki ashiba agi, la assistant commissioner ka ama inyakba mapang nunga parnok ajangzüktsü asoshi maparen tem balala lai senzüka doktsü.