Kaketshir nem tensa den apet shisaliok agütsütsüla: TR Zeliang

November 03, 2016 nü Dimapur nung Chief Minister, TR Zeliang-i Dimapur Government College  küm 50 Jubilee nüngshilong sayatsüba sülen Cabinet Minister tem, Parliamentary Secretary tem aser tongti ketdangsertem den külemi tangokba noksa ka angur.

Dimapur, November 03 (TYO): Nagaland Chief Minister, TR Zeliang-i, chichiba shisaliok jagi kaketshirtem nem tan tensa den tapet shisaliok agütsütsüla, ta metetdaktsü.
Brihostibarnü Dimapur Government College küm 50 ajungba Jubilee mong sentong nung jembidang TR Zeliang-i, “Asen state nung zünger mapa mangur nisung lakh ka dak tema lir. Linük tongtiretji lanurtem lir ta züngshir, aser parnokji mapa ka mesüra kar nung danga melira kobi melii lokti atema khuret asütsü,” ta metetdaktsü.
Pai ashiba agi, college ji angazükba tashi ka dang masü saka mapa inyakdaktsüba tashi ka asütsüla.
Tesasaba olen ka nung pai, tanübo asen state nung lokti meyong ali mesüra kiojen mezüngshiba yimya asenoki angur, ibayongji merumerortemi sorkar li aser kiojen atsünga agir, ta ashi.
Taoba mapang kari college li atsünga agitsü nokdangtetba atema pai college aser kaketshir Union nem tenüngsang agütsü.
Chief minister-isa, “Asen Naga nungertemi asen lokti nung onük balala atema asen tangatetba aser melungsentsü melenshitsü nüngdaka kümogo. Ibaji ajanga dang asen lokti nung nüngdakba temelenshi adoktsü aser lenla ajak nung terenlok kaa aintsü,” ta ashi.
Chief minister-i tesayurtem danga, kaketshirtemi office mapa nung dang merangloktsü saka nija sector nunga rangloktsüsa kaketshirtem ajungmesoa shisaliok tabensa agütsütsüla, ta ayongzük.
Tanep chief minister-i Jubilee nüngshilong azünga toktsü.
Higher & Technical Education Parliamentary Secvretary, Deo Nukhu-ia College Campus nung Science Block yanglutsü atema long azüngja liasü aser iba mapang pai, taküm financial year nungsa Science Block yanglu tenzüktsü aser taruba academic nungibo science stream tenzüktsü imlar, ta ashi.
Kasa sentong nung Urban Development Advisor, SI Jamir-i, shisaliok jenjang ajungkettsü atema Dimapur College amenoktsü asoshi tamalen bendanga inyakertem nem tenüngsang agütsü.
Tamalen iba college nung azüngertem tenüng nung jembidang Land Resources Secretary, Y. Kikheto Sema IAS-i, “Iba college nungi nüngtugu nisung aika adokogo, tanü asenok iba jenjang nung aliba atema tamalen azüngertemi tesayurtem nem tenüng tajung agütsütsüla,” ta ashi.
Chief minister den Cabinet züngsemtem aser Parliamentary Secretary tem aika dena liasü.
Jubilee mong sentong nungsa DGC Jubilee Choir-i ken ka aten aser Dream Unlimited (Alumni)-i Clean Election atema jilushi ka sayaa lokti ayongzük.
Kasa anogo nikongdang Dimapur College nung akhidang azüngertem aser tang tezüngdakpurtemi kenten menu sentong tajung ka ayongzüka liasü.
Iba sentong nung akhidang azüngertem tenüng nung Wb. Basu Damani-i jembi, Alumni Association Tir, Wb. A Yanger Jamiri tayongzükba o jembi aser shilem agirtem ajak dang Alumni Association Senyur, Wb. Mahesh Agarwal-i pelaba metetdaktsü.