Kaketshir samaba atema JNU kaketshirtemi longkak ait

Delhi, November 06 (Agencies): India Gate anasa JNU kaketshir, Najeeb Ahmed samaba atema Deobarnü Jawaharlal Nehru University (JNU) kaketshirtemi sorkar anema longkak aitogo.
Ano külen kaketshirtemi longkak aitba ajanga Delhi Police-i curfew ozüng Section 144 benoka liasü.
Tanü Delhi Chief Minister, Arvind Kejriwal-i, kaketshir ka hopta asem tejaklen samaba atema Union Ministry dang nungi report meshitsü ta Tir, Pranab Mukherjee-i nangzükogo, ta metetdaktsü.
Aam Aadmi Party (AAP) lenir Kejriwal-i Tir den phone ajanga jembidang Tiri ibaji nangzüka liasü.
JNU kaketshir Ahmed ya BJP den affiliate süa aliba Akhil Bharatiya Vidyarthi Parishad (ABVP) züngsemtem den raratepba sülen October 15 nü University nungi sama.
Ajisüaka ABVP-ibo, pa samaba nungji parnoki kecha shilem agia mali, ta shiogo.
“Pai (Tir) akokba tashi agi yaritsü aser MHA (Ministry of Home Affairs) o JNU nungi report meshitsü ta nangzükogo,” ta Kejriwal-i ashi.
November 04, 2016 nü Delhi Police Commissioner, Alok Kumar Verma-i, JNU kaketshir  indang osang metetdaktsür nem senpet lakh ana agütsütsü ta sangdonga lir.
Police telok balalaia Ajmer, Kota, Rae Bareli, Roorkee, Faizabad, Azamgarh aser Badaun nung Ahmed bushia senzüogo.
Ahmed ya Uttar Pradesh, Badayun nungi JNU nung 1st year MSc Biotechnology kaketshir ka lir aser pa Mahi Hostel nung telidak liasü.