Kaketshir tetsür aser tebur mebendangtsüla:Yitachu

Dimapur, October 30 (TYO): Education Minister, Yitachu-i, asenok ajak tebilemba melenshir, kaketshir tetsür aser tebur mebendangi maongka kasa agüja kaket shisatsü anganüa agütsütsüla, ta ajungshia liasü.
Eastern Academy Higher Secondary School Parents Day sentong nung Education Minister, Yitachu tongti tesemdanger ka ama jaoka liasü.
Sentong nung jembiba mapang pai, asenoki asen tanurtem nem kaket shisatsüji tajangzük angutsü atema dang masü saka parnok taküm lenitsü asoshi agütsütsüla, mesüra asenok iba nungji asongtsü, ta ashi.
Pai, sorkar school tem ajanga tanga school tem memeneper. Kar nem dang kaket shisatsü agütsütsü temulung agütsüba ajanga temelenshi bener marutettsü. Tangar menepnüra tanur ajak yongrü ka nung amshitsüla. Lokti atema khuret/tebilemtsü mekümdaktsütsü atema maongka tajung ajak agitsü merangtsüla, ta ashi.
Sorkari kaketshirtem asoshi chiyungtsü nungi shir nüngdakba ajak peria agütsür. Iba den külemi sorkari fail masüba inyakyim (No detention policy) agienogo, ajisüaka inyakyim tasenba ano melateti lir, ta paisa ashi.
Education Minister-i, lungkak aitba ajanga lokti ka taginüba sapoka shiteter ajisüaka iba ya mezüng yongi masü saka aiben jembir makokba mapang benshi tajungba asütsü, ta shisem.
Sentong tenzükdang school principal Malin Dey-i tarur pela agizük aser iba sülen tsüngsangba aser tsürang kongi tapu balala amshia shilem agia liasü.
Iba school 2005 küm LKG nungi Class V tashi lapokdang kaketshir 67 ang liasü. Tangbo school nung Higher Secondary class tem dena kaketshir ajak agi 1,000 shi kümogo.